Ճան Այլին «Սխալ ընտրություններ»

Կան մարդիկ, որոնց հետ երկար ժամանակ հնարավորություն չես ունեցել հանդիպելու, իսկ երբ ունեցել ես, տատանվել ես․ չհանդիպելը լավ է հանդիպելուց։

Կան բաներ, որոնք երբեք հնարավորություն չես ունեցել անելու, բայց երբ հնարավորությունը տրվել է, էլ չես ցանկացել անել։

Կան բառեր, որոնք թաղել ես քո սրտում, որովհետև երբեք առիթ չի եղել ասելու, բայց երբ պահը եկել է խոսելու, բերանիցդ տառ անգամ դուրս չի եկել։

Կան սերեր, որոնք հնարավորություն չեն ունեցել կյանքի կոչվելու․ երբ ունեցել են, էլ չես սիրել։

Կան մարդիկ, որոնց տեսնելու հնարավորություն միշտ եղել է, բայց պատճառներ ես գտել հանդիպումից խուսափելու համար․ երբ ցանկացել ես, հնարավորություն էլ չի եղել։

Կան բաներ, որոնք շատ անգամներ կարող էիր անել, բայց ամեն օր հետաձգել ես․ երբ ցանկացել ես անել, հնարավորություն չի եղել։

Կան խոսքեր, որոնք ասելու շատ հնարավորություններ են ընձեռվել, բայց մտածել ես, որ մի ուրիշ անգամ կասես․ երբ ցանկացել ես ասել, հնրավորություն էլ չի տրվել։

Կան սերեր, որոնք բազում անգամներ կարող էին կյանքումդ տեղ գտնել, բայց ուշադրություն չես դարձրել․ երբ ուշադրությունդ գրավել են, սիրելու հնարավորություն էլ չի եղել։

Կյանքը մեզ հեգնեց։ Խոստացանք մեկընդմիշտ միասին լինել, չգիտեմ ինչպես բաժանվեցինք։ Երկար ժամանակ մտածելուց հետո անգամ չկարողացա հասկանալ, թե ինչն էր մեր բաժանման պատճառը։ Հետո հանկարծ հասկացա․ ի սկզբանե մեր զգացմունքներն աներեր չէին։ Անթիվ դժվարությունների միջով անցանք, բայց ի վերջո միասին չմնացինք, ամենքս մի ուղղություն բռնեցինք։ Գուցե զայրույթն էր պատճառը, կամ էլ մի մանրուք։ Երբեմն պատկերացնում եմ մեր հաշտության քաղցրությունը կամ գրկախառնությունը, լացի ու ծիծաղի միախառնումը՝ երբ կրկին կհանդիպենք։ Կարծում եմ՝ գեղեցիկ պատկեր կլինի։ Մտքովս էլ չէր անցնի, որ մի բաժանումը մի ամբողջ կյանք կտևի։ Յուրաքանչյուրս մեր կյանքով ենք ապրում։ Մի ժամանակ սիրում էինք իրար, իսկ հիմա որևէ կապ չունենք իրար հետ։ Անգամ այս փոքր քաղաքում չպատահեցինք իրար, կարծում եմ՝ էլ երբենք չենք հանդիպի։ Մի օր, մի պահ, նույն փողոցով քայլելիս անգամ չենք տեսնի իրար։

Հառաչում եմ, ափսոսում․․․

Գուցե երջանիկ ես, որովհետև գտել ես քեզ համապատասխան մեկին։

Միգուցե երջանիկ չես, որովհետև քո ողջ կյանքում միայն մեկն է իսկապես սիրել քեզ: Իսկ դու վաղուց այդ մեկի մասին ոչ մի լուր չունես, չես մտածում նրա մասին, կամ գուցե չես ուզում մտածել...

Թարգմանությունը չինարենից ՝ © Քրիստինե Հովսեփյանի