Կիկի Դիմուլա | Բանաստեղծություններ

«Հաշվետվություն»

Երկու սյուն գծեք՝
այսօրվա վնասները
և շահումները նշելու համար։

Լուրջ իմաստները,
ձեր պայծառ մտքերը, ընթերցումները,
մի տողից մյուսը
անխախտ անցումները՝
նշեք շահումների սյունակում։

Երազանքները
իրենց փոքրիկ բացերով,
ձեր երևակայության հեշտ թռիչքները,
Այս բոլոր ձանձրույթի խորամանկությունների համար,
չգիտեմ, մի շտապեք,
գուցե դրանք վաղվա շահումների
սյունակում անհրաժեշտ լինեն։

Բայց ամբողջ օրը, որ անցավ,
չծիծաղեք և չմոռանաք՝
մեծ կորստյան սյունակում
այն նշեք:

* * *

«Որոշ գիշերներ»

Հիմա, որ ծովի հետևում
կորել են հին երազներս,
և նրանց կերպարը չի հասնում ինձ,
և հիշողությունը նրանց ինձ թողեց…

Երբեք չէի ցանկանա
վերադառնալ այսպիսի մտածողությունների։
Բայց գիշերներ են,
ինչ-որ անվերջ,
որ ծովերից
լիովին անխոնջ
հին երազներս
հետ են բերում:

* * *

«Մելանխոլիա»

Երկնքում մեծ մթություն է ճոճվում։
Եվ այսպես, ինչպես պատուհանը գրկեց ինձ,
մեկ ձեռքով
սենյակի մեջ ձգում եմ
փողոցի անհավատալի ամայությունը,
իսկ մյուսով վերցնում եմ
մի բուռ ամպամածություն
ու սերմանում իմ հոգում։

* * *

«Որոնում»

Հեռանում եմ։
Ո՞ւր՝ չեմ ասի քեզ։
Այնպես կվարվեմ,
որ կարծես մի գաղտնիք ունեմ քեզնից։

Կթափանցեմ խորքերը,
կհաշտվեմ ծովի հետ՝
վստահելով նրան իմ ալեկոծությունը,
կխառնեմ աստղերը իմ բարձրությանը,
կփորձեմ աղոթքով ցրել
երկնքի ամբողջականությունը,
գուցե այնտեղ թաքնված է քո առաքելությունը։

Եթե եկել ես գույները բացելու
և ձմեռները մաքրելու,
կամ բացասաբար շրջելու
իմ մտքերի հաշվարկը՝
թողնելով միայն քո հեռացումը։

Եթե գտնեմ նրան և արևոտ լինի,
կվազեմ՝ ամբողջովին կարմիր ու անսահման,
կրկին կարդալ այն քո աչքերում։

Եթե այն թաքնված է մրրկի մեջ,
կձևացնեմ, որ չեմ էլ կարդացել։

Եվ եթե նորից ապարդյուն եմ փնտրել,
իմ համբերությամբ կսեղմեմ կրծքիդ,
մինչև դու միայնակ դավաճանես նրան։

Թարգմանությունը հունարենից՝ © Մարի Գրիգորյանի