Գրքամոլ Ակումբ. Խումբ Չորրորդ. Հանդիպում III. Անդրե Մորուա «Նամակներ անծանոթուհուն»

2017-10-13 4730
Հոկտեմբերի 8-ին «Գրքամոլ» ակումբի հերթական հանդիպումը համընկավ Գրադարանավարի օրվա հետ և այդ խորհրդանշական օրը Երևանի առաջատար գրադարաններից մեկում՝ Ավ. Իսահակյանի անվան գրադարանում, կրկին անգամ հավաքվեցին ակումբականները: Այս անգամ քննարկման նյութը Անդրե Մորուայի «Նամակներ անծանոթուհուն» ստեղծագործությունն էր (1956 թ.)։ Գրքամոլցիները հավանել էին Մորուայի՝ որպես ստեղծագործողի, ուրույն և հետաքրքիր գրելաոճը, այն, թե ինչպես է նա կարողացել նուրբ հումորի, սարկազմի, հյութեղ լեզվի հետ մեկտեղել խորունկ փիլիսոփայությունը՝ կյանքի տարբեր օրինակներով ընթերցողին փոխանցելով բազմաթիվ իրավիճակային լուծումներ: Սակայն, հավանության արժանացնելու հետ մեկտեղ, ակումբականներին դուր չէր եկել գրքում խորհուրդների առատությունը: Ըստ քննարկման մասնակիցների՝ յուրաքանչյուրը կյանքում իր անձնական փորձով պետք է ինչ-որ բան սովորի, կյանքի փորձ ձեռք բերի, ոչ թե միայն ընթերցելով գրքերից, որտեղ գրված օրինակները տարբեր ժամանակաշրջանի և տարբեր պետությունների համար կարող են տարբեր լինել կամ լինել ոչ արդիական, անարդյունավետ: Քննարկումը, ինչպես լինում է միշտ ակումբի բոլոր հանդիպումների ժամանակ, անցավ ջերմ ու կառուցողական մթնոլորտում: Գրքամոլցիների առաջիկա քննարկումը ևս խոստանում է լինել հետաքրքիր. հոկտեմբերի 21-ին նրանք կքննարկեն Քամյուի գլուխգործոց «Անկումը»: Հ.Գ. Հանդիպման բոլոր նկարներն այստեղ:

Դիտեք ավելին Գրքամոլ Ակումբ բաժնում

մեկնաբանություններ