Պարույր Սևակ «Թրի դեմ գրիչ. Մաշտոցի սխրագործությունը»

► Երևակայությունն ու պատկերացումը նման լինելով՝ նույնը չեն։ Երևակայում են նաև մանուկները, մինչդեռ պատկերացնել կարող է հասուն մարդը։ Մաշտոցը եկավ դառնալու մեր պատկերացումը մեր իսկ գոյության, մեր իսկության։

► Մաշտոցն էր, որ եկավ դառնալու մեր հիշողությունը, հիշողությունը մեր իսկ գոյության, մեր իսկ մասին։

► Մաշտոցը մեզ երևում է նախ և առաջ իբրև մի վիթխարի քաղաքագետ, որի շահած անարյուն ճակատամարտի հետ չի կարող համեմատվել մեր սպարապետների փառավոր հաղթանակներից և ոչ մեկը։

► Մաշտոցը դարձավ մեր ջարդուփշուր ինքնության առաջին և ամենահմուտ դարբինը։ նա առաջինը վերաշինեց մեր ավերակները, վերականգնեց կործանվածը, նորոգեց քանդվածը և դրանով իսկ անմահացավ։

► Հողմացրիվ արված մեր հին մշակույթի տեղ նա սկզբնավորեց մի նոր մշակույթ, որ պիտի գլուխգործոցներ տար համաշխարհային քաղաքակրթությանը՝ Զվարթնոցի տեսքով ու Նարեկացու ոգով, Շիրակացու անզեն և Համբարձումյան զինավառ աչքերով։ Կոմիտասի ականջով, որ պիտի փոխանցվեր Խաչատրյանին, Թորոս Ռոսլինի մատներով, որ պիտի ժառանգեր Մարտիրոս Սարյանը, Սայաթ Նովայի բարբառով, որ պիտի լեզու դառնար Չարենցի բերանում։ Անիով,որ պիտի վերածվեր Երևանի...

► Այդ նա էր, որ մեր անգիր բանարվեստի փլատակների վրա հիմնադրեց մեր դպրությունն ու քերթությունը, գողթան լռեցված երգիչների տեղ հնչեցրեց մեր հոգևոր մեղեդին, հեթանոսական անգիտության տեղ փռեց գիտության հեքիաթական սփռոցը, որի վրա մեզ պիտի կերակուր տային մեր հոգևոր մատակարարները՝ Խորենացուց ու Դավիթ Անհաղթից մինչև Տաթևացի ու Գոշ, մինչև Ալիշան ու Նալբանդյան, մինչև Աբեղյան ու Աճառյան, Օրբելիներ ու Ալիխանյանաններ...

► Արդեն միայն Աստվածաշնչի թարգմանությամբ հայոց լեզուն կատարեց իր փառատոնը՝ ապացուցելով, որ ի զորու է լիապես արտահայտելու ինչպես պատմություն, այնպես էլ օրենսդրություն, ինչպես հրապարակախոսություն, այնպես էլ բանաստեղծություն, ինչպես բուսական ու կենդանաբանական աշխարհ, այնպես էլ երևակայություն-տեսիլք և կանխատեսություն-մարգարեություն։

► Այդ նա էր, որ այս ամենով մեզ ծանոթացրեցմեզ, տվեց ինքնաճանաչում, անվստահության տեղ դնելով ինքնավստահություն, հուսահատության տեղ՝ հուսալիություն, հավատաբեկության տեղ՝ հավատ, ինչպես նար
Քանակի դեմ՝ թև
Թվի դեմ՝ թռիչք,
Արյան դեմ՝ թանաք,
Թրի դեմ՝ գրիչ։
Եվ դարանի դեմ՝ Մատենադարան։

Հ.Գ. Եթե դուք ունեք մեջբերումներ` դուրս բերված այս գրքից, ապա կարող եք ուղարկել մեզ հետադարձ կապով: