Գրքամոլ Ակումբ. Խումբ Երկրորդ. Քննարկում առաջին. Թեոդոր Դրայզեր «Պատվար»
2015-09-23 4149
Սեպտեմբերի 19-ին Ավ. Իսահակյանի անվան գրադարանում տեղի ունեցավ «Գրքամոլ ակումբի» երկրորդ խմբի անդրանիկ քննարկումը։ Քննարկումը ծավալվում էր Թեոդոր Դրայզերի «Պատվար»-ը գործի շուրջ։ Վերջինս այնքան էր դուր եկել ընթերցողներին, որ խոսքը անգամ սեղմ ներկայացնելու դեպքում ակումբի մասնակիցները չէին տեղավորվում իրենց խոսքին հատկացված ժամանակահատվածում։ Քննարկման ընթացքում շոշափվեցին գործի բոլոր հիմնական կետերը, առանձնացվեցին կարևորագույն խնդիրները՝ արծարծված հեղինակի կողմից, ինչպես նաև յուրովի մեկնաբանվեց գործի վերնագիրը։ Քննարկումն ավարտվեց մի յուրօրինակ ձևաչափի կիրառմամբ, ըստ որի մասնակիցները բաժանվեցին երեխաների ու ծնողների ձայները ներկայացնող խմբերի ու փորձեցին արդարացնել իրենց կողմից պաշտպանվող կողմերը։ Հենց այստեղ է, որ մասնակիցներին սպասվում էր հաճելի անակնկալ: Յուրաքանչյուր կողմից պահանջվեց հակասել ինքն իրեն, ու հետաքրքրական էր հենց այն, որ կողմերը փորձում էին ամեն կերպ դուրս գալ հենց իրենց կողմից նախապես ներկայացված փաստարկումների ծանրության տակից։ Երբ վերջում քննարկվեց այս ձևաչափի կիրառման նպատակը, բոլորը եկան այն հայտարարի, որ մեդալը ունի երկու կողմ, որոնցից յուրաքանչյուրը ճիշտ է իր դրսևորմամբ, ու պետք չէ միանշանակ ժխտել ինչ-որ բան։
Ստացված համարելով Գրքամոլ Ակումբի 2-րդ խմբի առաջին քննարկումը, մեր ակումբի անդամներն արդեն անհամբերությամբ սպասում են հոկտեմբերի 3-ին կայանալիք հաջորդ քննարկմանը, որի ժամանակ քննարկվելու է Ջորջ Օրվելի «1984» գիրքը:
Հանդիպման բոլոր նկարներն այստեղ:
մեկնաբանություններ