ԵՊՀ Հայ Բանասիրության ֆակուլտետը, Գրքամոլ Ակումբը և Կաֆկայի «Կերպարանափոխություն»-ը մեկ վայրում

Կաֆկայի հերոսի` Գրեգոր  Զամզայի կերպարանափոխությունը մեծ տպավորություն էր գործել  փետրվարի 13-ին Ավ.Իսահակյանի անվան  գրադարանի դահլիճում հավաքվածների վրա: 20-րդ դարի ամենաօրիգինալ աշխատություններից մեկը` Ֆրանց Կաֆկայի «Կերպարանափոխություն» նովելը (1915թ.), որն ուսումնասիրվել է Արևմտյան կիսագնդի բազմաթիվ համալսարաններում և քոլեջներում, քննարկվեց Գրքամոլ ակումբի երկրորդ խմբում: Այս հանդիպումը, սակայն, առանձնանում էր նախորդներից, քանի որ ակումբը հյուրընկալել էր ԵՊՀ Հայ Բանասիրության ֆակուլտետի ուսանողներից, որոնց հետ երկխոսությունն անցավ հետաքրքիր և թեժ մթնոլորտում: 

Ինչպես Քամյուն է նկատել, Կաֆկային բնորոշ բնականությունը, սովորականի ու անսովորի, անհատականի և ընդհանուրի, ողբերգականի և առօրեականի, աբսուրդի և տրամաբանականի միջև ձգվող անվերջանալի անցումները քննարկման անվերջանալի թվացող նյութ տվեցին ներկաներին: Շրջիկ գործակալ Զամզայի կյանքում տեղի ունեցող փոփոխությունները, արտաքին աշխարհի հետ հարաբերվելուն առնչվող  խոչընդտները և իր նոր իրավիճակի հետ հարմարվել փորձող հերոսի ճիգերը ներկաներից ամեն մեկը ներկայացրեց իր տեսանկյունից: Նրանցից ոմանք անգամ մասնակիցներին առաջարկեցին պատկերացնել նովելի անսպասելի ավարտի այլ տարբերակներ:

Ընդհանուր առմամբ` քննարկման մասնակիցներին հաջողվեց  մի շարք հարցերի շուրջ  գտնել ընդհանուր եզրեր, իսկ որոշ դեպքերում նրանց կարծիքները չհամընկան. ամեն դեպքում մտքերի և զգացողությունների փոխանակությունը տվեց իր դրական արդյունքը:

Հանդիպման բոլոր նկարներն՝ այստեղ:

Հ.Գ. Գրքամոլ Ակումբի հաջորդ բաց հանդիպումը նախատեսված է փետրվարի 19-ին ժամը 18:00-ին Ավ. Իսահակյանի անվան գրադարանի Ամերիկյան Կենտրոնում, գիրք նվիրելու օրվա կապակցությամբ, որին կմասնակցեն Գրքամոլ էջի բոլոր ցանկացող ընթերցասերները: Միջոցառման մասնակիցներն իրենց հետ անպայման կբերեն գրքեր, որոնք կփոխանակեն ուրիշների հետ և ակումբից կհեռանան ձեռք բերած նոր գրքերով: Ինչպես նաև, հնարավորություն կունենաք հենց Գրքամոլ Ակումբի անդամների հետ ակումբում քննարկելու Ստեֆան Ցվեյգի «Անծանոթուհու Նամակը» ստեղծագործությունը: Սիրելի ընթերցողներ, կարդացեք այն, որպեսզի հանդիպմանը գաք պատրաստված:

Մինչ հանդիպում:

© Գրքամոլ Նախաձեռնություն