Շառլոթ Բրոնտե «Ջեյն Էյր»

► Երեխաները կարողանում են զգալ, բայց չեն կարողանում վերլուծել իրենց զգացմունքները և եթե մասամբ էլ վերլուծում են, նրանք բառերով ի վիճակի չեն արտահայտել այն:

► Աղքատությունը սարսափեցնում է չափահաս մարդկանց, առավել ևս սարսափեցում է երեխաներին: Նրանք չեն կարող պատկերացնել, որ գոյություն ունեն ջանասեր, գործունյա և ազնիվ աղքատներ: Այդ բառը նրանց կարծիքով միայն կապված է ցնցոտիների, աղքատիկ կերակրի, հանգած օջախի, կոպիտ արարքների և ստոր արատների հետ: Ինձ համար աքատությունը համանիշ էր ստորության:

► Մարդկային էակը պետք է մի որևէ բան սիրի: Եվ չունենալով սիրելու ավելի արժանի առարկա, ես հաճույք էի ստանում սիրելով ու փայփայելով մաշված մի կուռք, որն ավելի շատ նման էր քրքրված մի խրտվիլակի:

► Երեխան չի կարող կռվի մեջ մտնել չափահասների հետ, չի կարող ազատություն տալ իր կատաղությանը, և հետո խղճի սուր խայթ ու հակազդեցության սարսուռ չզգա:

► - Եթե վախենաք մարդկանցից, նրանք ձեզ չեն սիրի:-Բեսսի

► - Ոչ ոք չի կարող հույսը դնել ապագայի վրա:-Հելեն Բըրնս

► - Ավելի լավ է համբերությամբ տանել վիրավորանքը, որը բացի քեզնից, ուրիշ ոք ոչ չի զգում, քան թե կատարել շտապ քայլ, որի տհաճ հետևանքները վշտահար կանի քո մոտիկներին, բացի այդ, Աստվածաշունչն էլ առաջարկում է բարությամբ պատասխանել չարին:-Հելեն Բըրնս

► - Միայն թուլակամ ու հիմար մարդիկ են ասում, որ չեն կարող տանել այն, ինչ որ նրանց վիճակված է ի վերուստ:-Հելեն Բըրնս

► - Արտաքինից չի կարելի դատել մարդկանց մասին:-Հելեն Բըրնս

► - Եթե մարդիկ միշտ բարի լինեին և ենթարկվեին նրանց, ովքեր դաժան են ու անարդար, չար մարդիկ իրենց ուզածը կանեին: Ոչնչից չէին վախենա, երբեք չէին փոխվի, և կդառնային ավելի ու ավելի վատ: Երբ մեզ հարվածում են առանց պատճառի, մենք պետք է ավելի ուժեղ հարվածով պատասխան տանք, համոզված եմ դրանում, և այն էլ այնպիսի թափով, որպեսզի մարդիկ այլևս մեզ վրա ձեռք չբարձրացնեն: Պետք է ատեմ նրանց, ովքեր, չնայած իմ սիրաշահելու փորձերին, շարունակում են ատել ինձ. պետք է դիմադրեմ նրանց, ովքեր անիրավացի կերպով ինձ պատժում են: Դա նույնքան բնական է, ինչքան և սիրել նրանց, ովքեր մեզ սիրում են, կամ ենթարկվել պատժի, եթե զգում եմ, որ դա իրավացի է:-Ջեյն Էյր

► - Ոչ բռնությամբ կարելի է հաղթել ատելությանը և ոչ էլ վրեժխնդրությամբ որոշակի կերպով բուժել վիրավորանքը:-Հելեն Բըրնս

► - Սիրեցեք ձեր թշնամիներին, օրհնեցեք նրանց, ովքեր անիծում են ձեզ, բարիք գործեցեք նրանց, ովքեր ատում են ձեզ և ոխակալ են ձեր նկատմամբ:-Հելեն Բըրնս

► - Կյանքը շատ կարճ է, և մենք չպետք է ժամանակ կորցնենք թշնամություն սերմանելու կամ միմյանց սխալներն արձանագրելու: Մենք բոլորս էլ մեղքերով ծանրաբեռնված ենք այս աշխարհում, բայց շուտով կգա ժամանակ, երբ, հավատացած եմ, մեր մեղսապարտ մարմինը բեռնաթափ կլինի, երբ ստորությունն ու մեղքը մեր ծանրաբեռնված մարմնի հետ միասին կանհետանան, և կմնա միայն մաքուր հոգին՝ կյանքի ու մտածողության այդ անշոշափելի սկզբունքը, որով արարիչը կյանք ներշնչեց մարդ-արարածին: Նա որտեղից եկել է, այնտեղ էլ կվերադառնա, գուցե նորից կյանքի կոչելու մի ավելի բարձր էակ, քան մարդն է, գուցե անցնելով փառքի աստիճաններով՝ մարդկային գունատ հոգին հասնի սերովբեի պայծառությանը: Նա երբեք տառապանքների չի ենթարկվի, չի այլասերվի ու չի ընկնի սատանայի ձեռքը: Ոչ, չեմ կարող հավատալ դրան: Ես հետևում եմ մի ուրիշ դավանանքի, որը ոչ ոք ինձ չի սովորեցրել, որը ես միշտ չէ որ նշում եմ, բայց որի մեջ ես հաճույք եմ զգում և որին կառչում եմ, որովհետև նա հույս է տալիս բոլորին՝ հավիտենականությունը դարձնում է հանգստավետ վայր, մի հզոր հանգրվան, և ոչ թե սարսափի ու անդունդի կացարան: Բացի այդ, այդ դավանանքի միջոցով ես կարողանում եմ պարզորոշ կերպով տարբերել հանցագործին իր կատարած հանցանքից: Կարող եմ անկեղծորեն ներել առաջինը, իսկ վերջինս՝ ատել: Այս դավանանքով վրեժը երբեք չի մաշում իմ սիրտը, անկումը երբեք խորապես զզվանք չի առաջացնում իմ մեջ, անարդարությունը երբեք ինձ գետին չի տապալում: Ես ապրում եմ խաղաղության մեջ, սպասելով վախճանին:-Հելեն Բըրնս

► - Եթե ամբողջ աշխարհն էլ քեզ ատի և չար համարի, քո խիղճը քեզ կարդարացնի և թողություն կտա մեղքերիդ, երբեք առանց բարեկամների չես մնա:-Հելեն Բըրնս

► Մտքերս լողում էին իմ և էջերի միջև...

► - Այս աշխարհից բացի, մարդկային ցեղից բացի, կա մի ուրիշ՝ անտեսանելի աշխարհ, ոգիների թագավորություն: Այդ աշխարհը շրջապատում է մեզ, որովհետև նա ամեն տեղ է, և այդ ոգիները հսկում են մեզ, որովհետև նրանց գործը մեզ պահպանելն է: Եթե մեռնենք վշտից ու ամոթից, եթե արհամարհանքը շրջապատի և ատելությունը ճնշի մեզ՝ հրեշտակները տեսնում են մեր տառապանքները ու կհաստատեն մեր անմեղությունը (եթե իրոք անմեղ ենք): Իսկ աստված սպասում է միայն, որ մեր հոգին անջատվի մարմնից, որպեսզի պսակի մեզ լրիվ վարձատրությամբ: Ուրեմն ինչու՞ պետք է ընկճվենք վշտից, երբ կյանքը անցողիկ է, իսկ մահը միակ ճանապարհն է, որը տանում է դեպի երջանկություն՝ դեպի փառք:-Հելեն Բըրնս

► - Քո մասին կմտածենք այնպես, ինչպես դու քեզ ցույց կտաս:-միս Թեմպլ

► - Երբ հանցագործը որևէ բանում մեղադրվում է, նրան միշտ էլ թույլատրվում է պաշտպանվել:-միս Թեմպլ

► Քահանան, որ աչքը չէր հեռացրել ձեռքում բռնած գրքից և միայն մի պահ պահել էր շունչը, ձեռքը մեկնեց միստր Ռոչեսթըրին. շրթունքները բացվեցին, որպեսզի հարցնի՝ «Ուզու՞մ ես այս կնոջը վերցնել որպես կին», երբ մի պարզ ու մոտիկ ձայն արտասանեց. -Այս ամուսնությունը չի կարող կնքվել. ես հայտարարում եմ, որ խոչընդոտ կա:

► Ճիշտ է ասել Սողոմոնը՝ «ավելի լավ է կանաչից ճաշը սիրո հետ, քան պարարտ եզը ատելության հետ»:

► «Ինչքա՜ն տխուր է պառկած լինել հիմա անկողնում և զգալ, որ քեզ մահվան վտանգն է սպառնում: Այս աշխարհը սքանչելի՜ է, սարսափելի կլինի այստեղից կանչվել ու գնալ, չգիտես թե ուր»:-Ջեյն Էյր

► - Աստված երբեք չի քանդի այն, ինչ որ ստեղծել է:-Հելեն Բըրնս

► Ես դիմում եմ իմ հիշողություններին միայն այն դեպքում, երբ նրանք կարող են որոշ հետաքրքրություն ներկայացնել:

► Անփորձ մի երիտասարդի համար շատ տարօրինակ զգացում է, երբ իրեն բոլորովին մենակ է տեսնում աշխարհում: Հոսանքով կտրված բոլոր տեսակի կապերից, նա որոշակի չգիտի, արդյոք կհասնի այն նավահանգիստը, ուր նա ուղղում է իր քայլերը, և միաժամանակ բազմաթիվ խոչընդոտներ անհնարին են դարձնում վերադարձը դեպի անցյալը: Արկածների հմայքը, ճիշտ է, հաճելի է դարձնում, իսկ հպարտության բոցը ջերմացնում է այդ զգացումը, բայց հետո երկյուղը նորից է հուզում այն, և երբ կես ժամ անցնելուց հետո ես կրկին մենակ մնացի, սարսափը բոլորովին պատեց ինձ:

► Ինչքան ցավալի է լինում, երբ արածդ մնում է անպատասխան:

► «Մնաս բարով».- գոռաց սիրտս, երբ ես գնում էի, իսկ հուսահատությունը ավելացրեց` «Մնաս բարով ընդմիշտ»:

► - Սպասավորների հետ միշտ հարկավոր է պահպանել պատշաճ տարածություն, այլապես հեղինակությունդ կկորցնես:-Միսիս Ֆեյրֆաքս

► Երեխան միանգամից կենդանություն է մտցնում տան մեջ:

► Կան մարդիկ, որոնք, ըստ երևույթին, անընդունակ են բնավորությունը ուրվագրելու, դիտելու ու նկարագրելու մարդկանց կամ երևույթների միջև նկատվող ցայտուն գծերը:

► - Կյանքի թափընդհատ տենդից հետո խաղաղ կլինի և քունը:-Ջեյն Էյր

► Իզուր են պնդում, թե մարդիկ պետք է բավարարվեն խաղաղ կյանքով: Նրանց անհրաժեշտ է եռուն կյանք, և նրանք կստեղծեն այդ կյանքը, եթե չգտնեն այն: Միլիոնավոր մարդիկ դատապարտված են ունենալ ավելի խաղաղ ճակատագիր, քան ես, և միլիոններ լուռ ըմբոստանում են իրենց բախտի դեմ: Ոչ ոք չգիտի, թե որքան ապստամբություններ, բացի քաղաքական ապստամբություններից, բորբոքվում են կյանքի ընդերքում: Ենթադրում են, որ կանայք ընդհանրապես պետք է շատ հանգիստ լինեն, բայց կանայք էլ զգում են նույնը, ինչ որ տղամարդիկ: Նրանք պահանջ են զգում դրսևորել իրենց ունակությունները, որոնել ասպարեզ իրենց գործունեության համար, ինչպես իրենց եղբայրները: Նրանք տանջվում են խիստ դաժան լծից, խիստ ճահճացած միջավայրից, ճիշտ այնպես, ինչպես կտանջվեին և տղամարդիկ: Շատ սահմանափակ դատողություն է, երբ արտոնյալ արարածները պնդում են, որ կանայք պետք է բավարարվեն կարկանդակներ թխելով, գուլպաներ գործելով, դաշնամուր նվագելով ու պայուսակներ ասեղնագործելով: Անխոհեմություն է դատապարտել կանանց կամ ծիծաղել նրանց վրա, եթե նրանք ուզում են ավելին անել կամ ավելին սովորել, քան այն, ինչին սովորությունը հարկադրում է նրանց սեռին:

► Մի բարի գործ կարող է քավել բազմաթիվ մեղքեր՝ մեծ թե փոքր:-Ռոչեսթըր

► - Մի՞թե կարծում եք, որ կարող եմ մնալ և դառնալ ձեզ համար ոչնչություն: Կամ գուցե կարծում եք` ես ավտոմա՞տ եմ, մեքենա՞, առանց զգացմունքների և կհանդուրժեմ բերանիցս հացի կտորը խլեն և կենսատու ջրի կաթիլը բաժակիցս թափեն: Կարծում եք, որ եթե չքավոր եմ, աննկատելի, հասարակ, հասակով փոքր ու ոչ գեղեցիկ, հոգի ու սիրտ չունե՞մ: Դուք սխալվում եք: Ես ունեմ նույնպիսի հոգի, որպիսին և դուք, և, իհարկե, նույնպիսի սիրտ: Եվ եթե աստված ինձ շնորհած լիներ մի փոքր գեղեցկություն ու զգալի հարստություն, ձեզ համար նույնքան դժվար կլիներ բաժանվել ինձնից, որքան այժմ ինձ համար: Ես հիմա ձեզ հետ չեմ խոսում ընդուված սովորության ու պայմանականությունների լեզվով. նույնիսկ խոսում եմ հաշվի չառնելով մահկանացու մարմինը, դա իմ հոգին է, որ դիմում է ձեր հոգուն, ասես երկուսս էլ գերեզմանից անցել, կանգնել ենք աստծո առաջ, իրար հավասար, ինչպես և ենք իրականում: 

► - Դուք երբեք չեզ զգացել, թե ինչ բան է խանդը, այնպես չէ՞, միս Էյր: Իհարկե ոչ: Կարիք էլ չկա հարցնելու, որովհետև դուք երբեք չեզ զգացել, թե ինչ բան է սերը: Դուք այդ երկու զգացմունքները դեռ պետք է փորձեք: Ձեր հոգին քնած է: Հարկավոր է մի ցնցում, որպեսզի արթնանա: Դուք կարծում եք, որ ձեր ամբողջ կյանքը հանգիստ առաջ կընթանա ճիշտ այն հոսանքի պես, որով մինչև այժմ սահել անցել է ձեր պատանեկությունը: Լող տալով դուք կշարունակեք առաջ գնալ փակ աչքերով ու փակ ականջներով, առանց տեսնելու գետի մեջ բարձրացող մռայլ ժայռերը, առանց լսելու նրանց շուրջը եռացող հսկա ալիքները: Բայց ես ձեզ ասում եմ, և ուշադրություն դարձրեք իմ խոսքերին, կգա մի օր, ԵՐԲ ԴԵՄ ԿԱՌՆԵՔ ԺԱՅՌՈՏ ԳԵՏԻՆ, որտեղից կյանքի ամբողջ հոսանքը կփոխվի և կդառնա փրփրադեզ, շառաչող ու աղմկալից ջրապտույտ: Եվ կամ դուք կդիպչեք ժայռերին ու կջախջախվեք, կամ մի որևէ հուսատու ալիք ձեզ վեր կբարձրացնի, կտանի ու կնետի մի ավելի խաղաղ հորձանքի մեջ, ինչպես ինձ տարավ...-Ռոչեսթըր

► Դուք մրսում եք, որովհետև մենակ եք՝ ձեր մեջ եղած կրակը չի շփվում ուրիշ կրակի հետ: Դուք հիվանդ եք նրանից, որ զգացմունքներից ամենադուրեկանը, ամենաբարձրն ու ամենաքաղցրը, որով օժտված է մարդը, ձեզ անհայտ է: Դուք հիմար եք, որովհետև գերադասում եք տանջվել, բայց չեք ուզում այն ձեր կողմը գրավել և ոչ մի քայլ չեք անում, որպեսզի դիմավորեք նրան այնտեղ, որտեղ սպասում է ձեզ:

► Հին առածն ասում է. «Այն, ինչ փայլում է, դեռ ոսկի չէ»:-միսիս Ֆեյրֆաքս

► Նա ինձ ներել էր, բայց չէր մոռացել այդ բառերը և քանի դեռ ապրում ենք, դրանք երբեք չէր մոռանա:

► Ոչ մի կնոջ համար պատվաբեր չէ, երբ նա հրապուրվում է իրենից բարձր կանգնածի շողոքորթություններով, եթե մտադիր չէ ամուսնանալ այդ կնոջ հետ:

► Հարգիր ինքդ քեզ ու սրտիդ ամբողջ սերը, ուժդ ու հոգիդ մի տուր նրան, ում դրանք հարկավոր չեն և ում կողմից կարժանանան միայն արհամարհանքի:-Ջեյն Էյր

► Շատ ճիշտ է այն առածը, որ ասում է՝ «Սրտով սիրածը սիրուն կլինի»:

► Ուսուցիչների ամենացանկալի նվերն այն է, երբ գովում են նրանց աշակերտների առաջադիմությունը։-Ջեյն Էյր

► Տղամարդը ոչնչություն է, եթե նրա մեջ սատանայական որևէ վատ բան չկա:-միս Ինգրեմ

► Ես գտնում եմ, որ տգեղ կինը բիծ է բնության վրա , իսկ ինչ վերաբերում է տղամարդուն, նրանից պահանջվում է միայն ուժ ու արիություն:-Բլանշ

► Դա անակնկալ հանդիպում էր, և ես տանջալից կերպով խեղդեցի ուրախությունս: Դժվարությամբ կարողացա զսպել ինձ, որպեսզի չբացականչեմ և չնետվեմ առաջ` դեպի նա:

► Թեման միշտ նույնն է՝ սիրահետել, իսկ վերջում նույն վախճանը՝ ամուսնություն:-Ջեյն Էյր

► - Ունկնդրի ագահությունը աշխուժացնում է պատմողի լեզուն:-Ջեյն Էյր

► Կրքերը կարող են փոթորկվել, ցանկությունները կարող են նկարել ամեն տեսակի դատարկ պատկերներ, բայց յուրաքանչյուր դեպքում վերջին խոսքը պատկանում է դատողությանը, և միայն նա վճռական ձայն կունենա հարցերը լուծելիս:

► Նախազգացումները տարօրինա՜կ երևույթներ են: Տարօրինակ են և համակրանքներն ու նշանները: Դրանք երեք մասին կազմում են մի ընդհանուր գաղտնիք, որի բանալին մարդկությունը դեռ չի գտել: Ինչ վերաբերում է նշաններին, ապա դրանք թերևս բնության համակրանքներն են մարդու նկատմամբ:

► Ես չեմ համարձակվում ասել ձեզ, թե որն է իմ խոցելի տեղը, այլապես դուք, ինչքան էլ հավատարիմ ու բարեկամաբար տրամադրված լինեք իմ հանդեպ, իսկույն կխոցեք ինձ:-Ռոչեսթըր ► Մի խոսքը երբեմն ավելի ջերմ կարող է հնչել, քան բազմաթիվ ուրիշ խոսքեր:-Ջեյն Էյր

► Ինչ երջանկություն է, որ ժամանակը խեղդում է մեր մեջ վրեժխնդրության տենչը ու խլացնում է զայրույթի ու զզվանքի դրդապատճառները:

► Ոչ զգայուն բնավորությունը շուտ չի մեղմանում, և ոչ էլ բնական հակակրանքներն են անմիջապես վերանում:

► Առանց դատողության զգացմունքը հեղուկ է միայն, բայց և զգացմունքով չմեղմացրած դատողությունը դառն ու ցամաք ուտելիք է մարդկային գործածության համար:

► Լավ կլինի, եթե թեթևացնեմ սիրտս մահից առաջ: Այն, ինչի մասին առողջ ժամանակ քիչ ենք մտածում, քարի պես հոգուդ վրա ծանրանում է այնպիսի ժամին, ինչպիսին հիմա է:-միսիս Ռիդ ► Բայց ի՞նչն է ավելի համառ, քան երիտասարդությունը, ի՞նչն է ավելի կույր, քան անփորձությունը:

► Չկա ավելի մեծ երջանկություն, քան այն, երբ տեսնում ես, որ մարդիկ քեզ սիրում են և զգում ես, որ քո ներկայությունը նրանց սփոփանքի լրացումն է:

► Երբ բարեկամները բաժանման նախօրյակին են, նրանք ցանկանում են միասին անցկացնել այն քիչ ժամանակը, որը մնում է նրանց:-Ռոչեսթըր

► Տուր ինձ երջանկություն, և ես քեզ երջանիկ կդարձնեմ:-Ռոչեսթըր

► Ավելի լավ է հոգնեցնել մարմինը, քան տանջել սիրտը։-Ջեյն Էյր

► Բարեկամները միշտ մոռանում են նրանց, ում բախտը լքում է:

► Չկա ավելի անիմաստ բան, քան այն, երբ հասարակության մեջ եղած մրցակցությունները, երիտասարդության վավաշոտությունը, անխոհեմությունն ու կուրությունը դրդում են մարդուն անխոհեմ քայլեր կատարելու:

► - Կարեկցությունը որոշ մարդկանց կողմից ողորմության պես վնասակար ու վիրավորական մի բան է, որ ուզում ես հետ շպրտել բոլոր նրանց երեսին, ովքեր առաջարկում են այն, բայց դա կարեկցության մի տեսակն է, որ յուրահատուկ է կոպիտ, եսասիրական սրտերին. դա մի խառնուրդ է, որի մեջ տառապանքներից ստացած եսասիրական վիշտը միաձուլվում է տգետ արհամարհանքի հետ դեպի բոլոր նրանք, ովքեր տանում եյն այդ տառապանքները: Բայց քո կարեկցությունն այդպիսին չէ, Ջեյն...-Ռոչեսթըր

► - Սիրուհի վարձել ավելի վատ է, քան ստրուկ գնել: Թե՛ մեկը և թե՛ մյուսը, և՛ ի ծնե, և՛ դիրքի տեսանկյունից ստոր արարածներ են, և նրանց հետ մտերմական կապեր ունենալը ստորացուցիչ բան է:-Ռոչեսթըր ► - Ի՞նչ կարիք կա մտածելու անցյալի մասին, երբ ներկան ավելի կայուն է, իսկ ապագան կլինի շատ ավելի պայծառ:-Ռոչեսթըր

► - Ի՞նչ կարիք կա վերադառնալ Անցյալին, եթե Ներկադ այդքան հստակ է, և Ապագադ՝ այդան լուսավոր:-Ռոչեսթըր

► Սիրել նվիրական և մաքուր սիրով, եթե ինձ սիրում են հավատարմորեն ու անկեղծորեն:-Ռոչեսթըր

► Ոչ մի մարդկային էակ, որը երբևիցե ապրել է աշխարհում, չէր կարող տենչալ ավելի ուժեղ սեր, քան այն, որ ինձ բաժին էր ընկել, իսկ նրան, ով ինձ այդպես սիրում էր, ես պաշտում էի: Եվ ես պետք է հրաժարվեի այդ սիրուց ու կուռքից: Մի սոսկալի բառ հիշեցնում էր ինձ իմ տանջալից պարտականության մասին՝ «հեռանալ»:

► Մենք ծնվել ենք, որպեսզի պայքարենք ու տանջվենք. ինչպես դուք, այնպես էլ ես:-Ջեյն Էյր

► Այժմ կուզենայի ձեզ հետ լինել մի խաղաղ կղզում, որպեսզի և՛ նեղությունը, և՛ վտանգը, և՛ սարսափելի հիշողությունները անհետ կորչեին...

► Քո հոգին ինձ համար գանձ է, և եթե դու հիվանդանայիր, նորից իմ գանձը կլինեիր. եթե դու զառանցեիր, քեզ գրկումս կպահեի և զսպաշապիկ չէի հագցնի, քո շփումը, նույնիսկ կատաղած ժամանակ, ինձ կհրապուրեր: Եթե վայրենաբար հարձակվեիր ինձ վրա, ինչպես այդ կինն արեց այս առավոտ, սիրով գրկաբաց կընդունեի քեզ: Զզվանքով չէի խորշի քեզնից, ինչպես նրանից, և քո հանգստի րոպեներին, ինձնից բացի, ոչ մի ուրիշ պահապան չէր լինի, անխոնջ քնքշությամբ կհետևեի քեզ, եթե նույնիսկ դու ինձ քո փոխադարձ ժպիտին չարժանացնեիր, երբեք չէի հոգնի աչքերիդ նայելուց, եթե նրանք այլևս չճանաչեին ինձ...

► Մի՞թե ավելի լավ է մոտիկ մարդուն դատապարտել հուսահատության, քան խախտել մարդկային օրենքը, եթե այդ խախտումը ոչ ոքի վնաս չի պատճառի:-Ռոչեսթըր

► Ինչքան ավելի եմ զգում, որ մենակ եմ, առանց բարեկամի, առանց պաշտպանի, այնքան ավելի եմ համոզվում, որ ինքս պետք է ինձ հարգեմ:-Ջեյն Էյր

► Օրենքներն ու սկզբունքները այն ժամերի համար չեն, երբ գայթակղություն չկա: Դրանք հենց այնպիսի րոպեների համար են, երբ հոգին ու մարմինը ըմբոստանում են դրանց դաժանության դեմ, բայց ինչքան էլ խիստ լինեն, դրանք չպետք է խախտվեն:

► Հոգին ունի իր մեկնիչը, հաճախ անգիտակից, բայց իսկական մեկնիչը՝ աչքերը:

► Ինչու պետք է մերժեի, երբ մենք երկուսս միասին շատ ավելի երջանիկ էինք, քան իրարից հեռու:

► Այժմ չէի կարող ինձ թույլ տալ մտածել, ոչ մի հաայցք դեպի հետ և նույնիսկ՝ դեպի առաջ: Չպետք է մտածել ոչ անցյալի և ոչ էլ ապագայի մասին: Անցյալը երկնային երանելիության այնպիսի մի էջ էր, այնպիսի մահացու տխրություն, որ եթե մի տող անգամ կարդայի, կթուլացներ քաջությունս և կկոտրտր թափս: Իսկ ապագան ահազդու դատարկություն էր, նման էր աշխարհին՝ ջրհեղեղից հետո:

► Նա, ով գեղատեսիլ վայրով քայլում է դեպի կառափնարան, մտածում է ոչ թե ծաղիկների, որոնք ճամփին ժպտում են նրան, այլ միայն կառափնարանի ու կացնի, ոսկորների ու երակների անջատման, գերեզմանի մասին, որոնք սպասում են նրան ճամփի վերջում:

► Ես մտքերը կշռադատում եմ զայրույթիս նժարի, իսկ գործերը` ցասման նժարի վրա:

► Թռչունները հավատարիմ են իրենց ընկերներին. նրանք սիրո խորհրդանիշներ են:

► Եթե ամբողջ աշխարհը քեզ ատի ու արհամարհի` դու կգտնես ընկերներ, եթե մաքուր ես քո խղճի առաջ:

► Ազնիվ ընթերցող, թող երբեք չզգաս այն, ինչ որ այդ պահին զգում էի ես: Թող քո աչքերից երբևէ այնպիսի փոթորկահույզ, սրտամաշ, աղի արցունքներ չթափվեն, ինչպիսին հորդեցին իմ աչքերից: Թող երբեք այդպիսի անհույս ու հուսահատ աղոթքներով չդիմես երկնքին, ինչպիսին այդ ժամին արտասանեցին իմ շրթունքները, և թող երբեք ինձ նման չսարսափես, որ կդժբախտացնես նրան, ում սիրում ես:

► Գիտենք, որ աստված ամենագո է, բայց, անկասկած, ամենից շատ նրա ներկայությունը զգացվում է մեր առաջ փռված նրա արարման վեհության մեջ. և հենց անամպ գիշերային երկնքում, որտեղ նրա աշխարհները ընթանում են իրենց լուռ ընթացքով, ամենապարզ կեպրով կարդում ենք նրա անսահմանությունը, ամենակարողությունը, նրա ամենագո լինելը:

► Երբ օտարականները գնում են մի տեղ, որտեղ բարեկամներ չունեն, և աշխատանք են փնտրում, երբեմն խորհուրդների և օժանդակության համար դիմում են քահանային: Քահանայի պարտականությունն էլ հենց այն է, որ օգնի՝ գոնե խորհուրդներով, բոլոր նրանց, ովքեր օգնության կարիք ունեն:

► Ոմանք հավատացնում են, որ բավականություն են զգում, երբ հետադարձ հայացք են գցում անցյալի վշտալից վերապրումների վրա, սակայն այսօր ինձ համար դժվար է վերհիշել կյանքիս այդ շրջանը. բարոյական ննվաստացումը, ֆիզիկական տռապանքների հետ միասին, չափազանց տխուր հիշողություններ են, որպեսզի կարելի լինի նրանցով վերապրել:

► Ամենալավ մարդկանցից ոմանք, որ երբևէ ապրել են, նույնպես կարիքի մեջ են եղել, ինչպես և ես. և եթե դուք քրիստոնուհի եք, ապա չքավորությունը չպետք է ոճրագործություն համարեք:-Ջեյն Էյր

► Ես միշտ հաճույք եմ զգացել հնազանդվել հեղինակությանը, եթե մայն դա եղել է խելացի հեղինակություն, ենթարկվել ուժեղ կամքին այն ժամանակ, երբ թույլ են տվել խիղճս ու արժանապատվությունս:

► - Միշտ սովորություն է եղել կարճ հարցին տալ կարճ պատասխան, ուղիղ հարցին՝ պարզ պատասխան:-Ջեյն Էյր

► Մարկդանց բարեկեցությանը նվիրված աշխատանքը չի կարող ստորացուցիչ համարվել:-Սենտ Ջոն

► - Դժվար է ձգտումները զսպել և կոտրել բնական հատումը, բայց որ դա հնարավոր է, ես համոզվեցի իմ անձնական փորձից: Աստված, որոշ իմաստով, մեզ շնորհել է իշխանություն, որպեսզի մեր բախտը կերտենք, և երբ մեր ուժերը պահանջում են սնունդ, որը չենք կարող գտնել, երբ մեր կամքը ձգտում է դեպի ճանապարհ, որը փակ է մեր առաջ, մենք ուժասպառությունից չպետք է մեռնենք և ոչ էլ հուսահատվենք. պետք է մեր հոգու համար ուրիշ սնունդ որոնենք, որը լինի նույնքան ուժեղ, որքան և արգելված պտուղը, որից մեր հոգին ուզում է ճաշակել, և որը գուցե և լինի ավելի մաքուր, և մեր խիզախումների համար ճանապարհ հարթենք, որը գուցե լինի ավելի խորդուբորդ, բայց նույքան պարզ ու լայն, որքան և այն, որը բախտը փակել է մեր առաջ:-Սենտ Ջոն

► Ապրել շրջապատված ընդհանուր հարգանքով, լինի դա թեկուզ աշխատավոր մարդկանց հարգանքը, միևնույն է, թե «նստես արևի տակ, զգաս քեզ հանգիստ ու հաճելի». խաղաղ զգացմունքները ծիլեր են տալիս և ծաղկում շողերի տակ:

► - Մեր մեղրամիսը կփայլի մեր ամբողջ կյանքի ընթացքում, և նրա ճառագայթները կմարեն միայն քո և իմ գերեզմանի վրա:-Ռոչեսթըր

► Երեխային, որին մենք դիտում ու դաստիարակում ենք, ավելի շատ ենք կապվում, քան հասակն առած, թեկուզև գրավիչ անձնավորությանը:

► Կաթիլը ծակում է քարը:

► Որևէ բան տալ, երբ շատ ենք ստացել, նշանակում է միայն բաց անել մեր մեջ անսովոր կերպով եռացող զգացմունքների փականը:

► Ոչ մի բան այնքան անիմաստ ու անհիմն չէ, որքան այն, երբ ստիպված ես քարշ տալ օրերդ, ակնկալելով, որ հանգամանքների մեջ կկատարվի ինչ-որ անհնարին փոփոխություն, որը նորից կմիացնի ինձ նրա հետ:

► - Մենք պարտավոր ենք աշխատել, քանի դեռ ցերեկ է, որովհետև «կգա գիշերը, երբ ոչ ոք չի կարող աշխատել»:-Սենտ Ջոն

► Այնտեղ, որտեղ ուժ կա հրամայելու, հնազանդությունը միշտ ենթարկվում է:

► Միասին լինել՝ նշանակում է նույնքան ազատ լինել, որքան մենակության մեջ, և նույնքան ուրախ, որքան հասարակության մեջ:

Հ.Գ. Եթե դուք ունեք մեջբերումներ` դուրս բերված այս գրքից, ապա կարող եք ուղարկել մեզ հետադարձ կապով: