Ամառային ընթերցանություն. խորհուրդ է տալիս Գրքամոլը

2019-06-13 11385

Բոլոր եղանակներն էլ կատարյալ են ընթերցանության համար, ամառը՝ հատկապես։ Մի քանի գրքախորհուրդներ Գրքամոլից։

1․ Ալաա ալ-Ասուանի․ «Յակուբյան շենքը»

Շատերն ամառային հանգիստը նախընտրում են անցկացնել հենց այն երկրում, որտեղ ծնվել է գրող Ալաա ալ-Ասուանին։ Եգիպտոս։ Եթե հնարավարություն չունեք ֆիզիկապես տեղափոխվելու այդ երկիր, ապա այս գիրքը ձեզ մտովի կտեղափոխի Կահիրե, կանցկացնեք դինամիկ ամառային հանգիստ տեքստի հետ ու ընթերցանությունից հետո հանգստացած կվերադառնաք Հայաստան։  

2․ Բերնհարդ Շլինկ․ «Ընթերցողը»

Սիրային պատմությունները միշտ են արդիական ու ընթերցվող, սակայն Բերնհարդ Շլինկի «Ընթերցողը» վեպը միայն տասնհինգամյա պատանու և երեսունվեցամյա կնոջ սիրո պատմություն չէ, այլ ներկայացնում է մի քանի սերունդների պատմություն ու բախում։

3․ Վլադիմիր Նաբոկով «Լոլիտա»

Ինչու՞ հենց այս գիրքը։ Քանի որ այն մենք երբեմն պատկերացնում ենք ամառային կանաչ խոտերի մեջ պառկած ու քեզ չարաճճի աչքերով նայող աղջնակի պատմություն, այնինչ իրականում Նաբոկովի «Լոլիտան» ողբերգական պատմություն է, և յուրաքանչյուր ընթերցող ինքն է որոշում ինչ անուն դնել այդ պատմությանը։ Երևանում կանաչ ու զով այգիներ շատ կան, որտեղ կարելի է վայելել այս սիրուն գրքի ընթերցանությունը։

4․ «Աստիճան ըստ ցելսիուսի»

Երբ դրսում եղանակը շուտով կհասնի 390C, և այս գիրքը ձեր ձեռքերում կդառնա ամբողջությամբ սպիտակ, քանի որ այն ջերմազգայուն է, վատ չի լինի մի բաժակ թեյ պատվիրել մոտակա սրճարանում ու վայելել այն։ Այո՛, ամռանը թեյն ու իրանական պոեզիան կարող են նաև զովացնել։

5․ Ուիլյամ Սարոյան․ «Մայրիկ, ես սիրում եմ քեզ»

Գրքի ամառային շապիկն արդեն իսկ տրամադրում է ընթերցելու Սարոյանի այս վեպը, որտեղ ամենածանր թեմաներն իսկ մոր և դստեր միջև քննարկվում են արևի շողերի տակ ու փետուրի թեթևությամբ։ Սարոյանի բոլոր գործերից հետո սկսում ես անսահման սիրել կյանքը, և այս մեկն էլ բացառություն չէ։
 

Դիտեք ավելին Այլ բաժնում

մեկնաբանություններ