Դոնալդ Մարգուլիսն ամերիկացի դրամատուրգ է, ում «Ընթրիք ընկերների հետ» պիեսը 2000թ․-ին արժանացել է Պուլիցերյան մրցանակի։ Իր մի շարք այլ պիեսներ՝ «Բրուքլինի տղան», «Գյուղի տունը» և այլն, արժանացել են Թոնի, Օբի մրցանակների, ինչպես նաև բեմադրվել է Բրոդվեյի և մի շարք այլ թատրոններում՝ ԱՄՆ-ում և դրանից դուրս։ Բացի այդ, Մարգուլիսը մշակել է բազմաթիվ սցենարներ, հեռուստանովելներ, սերիալներ այնպիսի ֆիմլարտադրողների համար, ինչպիսիք են HBO-ն, CBS-ը, Warner Brothers-ը, Paramount-ը և այլն։ Ներկայումս դրամատուրգը դասավանդում է Յեյլի համալսարանում՝ որպես անգլերենի և թատրոնագիտության մասնագետ։

«Ընթրիք ընկերների հետ» պիեսի պրեմիերան տեղի է ունեցել 1998 թ․-ին՝ Լուիսվիլի թատրոնում՝ «Հումանա» փառատոնի շրջանակներում: Այն պատմում է բաժանման եզրին կանգնած ամուսինների մասին, որոնց հարաբերությունները հիմնովին խարխլվում են, երբ նրանցից մեկը որոշում է բաժանվել։

Առաջին տեսարանը սկսվում է Գեյբի ու Քերընի՝ երջանիկ, միջին տարիքի ամուսնացած զույգի նկարագրությամբ, ովքեր ապրում են Կոնեկտիկուտում^[1]։ Նրանք երկար տարիներ ընկերություն են անում մեկ այլ ամուսնական զույգի՝ Թոմի և Բեթի հետ։ Իրականում հենց Գեյբն ու Քերընն են ծանոթացրել իրենց ընկերներին միմյանց հետ։ Նրանք բոլորն էլ երջանիկ են թվում իրենց ամուսնական կյանքում, սակայն մի անգամ Գեյբի և Քերընի տանն ընթրելիս Բեթը լացակումած հայտնում է, որ պատրաստվում է ամուսնալուծվել ամուսնուց՝ Թոմի դավաճանության պատճառով։ Գեյբն ու Քերընը ցնցվում են լուրից, քանի որ միշտ մտածել են, որ չորսով միասին պիտի ապրեն մինչև խոր ծերություն։ Թոմը, սակայն, ով գործուղման մեջ էր գտնվում, տեղյակ չէ, որ կինն ընկերներին հայտնել է բաժանման լուրը:

Հաջորդ տեսարանում, երբ Թոմն արդեն տանն է, իմանում է, որ Բեթն ընկերներին պատմել է ամուսնալուծության մասին, որից հետո Թոմը վրդովված շտապում է ընկերների տուն։ Թոմը կարծում էր, որ կինն իրեն որպես զոհ է ներկայացրել ու իր պարտքն է համարում ընկերներին ներկայացնել եղելությունն իր տեսանկյունից։

Պատմությունն այստեղ սկսվում է ներկայացվել ֆլեշբեքի տեսքով, երբ 12 տարի առաջ այս չորս կերպարները Վինյարդում^[2] գտնվող հանգստյան տանն իրենց արձակուրդն են վայելում, որի ժամանակ Քերընն ու Գեյբը Բեթին ծանոթացնում են Թոմի հետ: Այստեղ բոլորը երջանիկ են, անհոգ ու սիրահարված։ Այնուհետև, ներկայացվում է մեկ այլ տեսարան, որը սկսվում է զարգանալ առաջին տեսարանից՝ Թոմի ու Բեթի բաժանումից 5 ամիս անց։ Այստեղ Բեթը Քերընին խոստովանում է, որ սիրային կապի մեջ է իր հին ընկերներից մեկի հետ և որ պլանավորում են ամուսնանալ։ Ավելի ուշ այդ նույն օրը, Թոմը բարերից մեկում Գեյբին հայտնում է իրեն հանդիպած նորաշունչ երջանկության մասին, ինչին Գեյբը բավականին բարկացած է արձագանքում։ Երեկոյան Գեյբն ու Քերընը Վայնյարդի ամառանոցում քննարկում են իրենց ընկերների հետ կատարվածն ու նրանց արդեն նոր կյանքի սկիզբը, որը զուգահեռ համեմատում են նաև իրենց ամուսնական կյանքի հետ։

Պիեսի ընթացքում երկու զույգերն էլ երևում են իրենց կյանքի տարբեր տարիքում և փուլերում։ Թոմի և Բեթի բաժանումը ազդում է Գեյբի և Քերընի վրա, ովքեր սկզբում իրենց հարկադրված են զգում բռնել մեկի, ապա՝ մյուսի կողմը, իսկ հետո սկսում են մտորել արդեն իրենց ամուսնության և սիրո ամրության մասին, կասկածի տակ առնել այն, քննարկել։