Լին-Մանուել Միրանդա «Հեմիլթոն»

Լին-Մանուել Միրանդան ամերիկացի դերասան է, կոմպոզիտոր, քնարերգու և գրող՝ ծնված 1980թ. Նյու Յորքում: Նա և՛ հեղինակել է, և՛ բեմադրել պիեսներ, խաղացել գլխավոր դերերում: Նրա պիեսները միաձուլում են ժամանակակից երաժշտական ձևերը (մյուզիքլ) դասական երաժշտական թատրոնի հետ: Թերևս նրա ամենահայտնի գործը «Հեմիլթոն»-ն է՝ Ալեքսանդր Հեմիլթոնի մասին հիփ-հոփ մյուզիքլը:

Միրանդան իր հերոսի կյանքը ներկայացրել է որպես ամերիկյան ուշագրավ պատմություն: Հեմիլթոնը ծնվել է Կարիբյան ծովի փոքրիկ Նևիս կղզում և դարձել ԱՄՆ առաջատար պետական գործիչ, ԱՄՆ գանձապետարանի առաջին քարտուղար: Նրա կյանքում եղել են դրամատիկ վերելքներ և անկումներ՝ հեղափոխություն, սիրային սկանդալ, շանտաժ և վերջում մենամարտ, որի ժամանակ նա սպանվում է ԱՄՆ փոխնախագահի ձեռքով: Այսպիսով, Հեմիլթոնի կյանքի պատմությունը հիանալի նյութ է դարձել դրամատիկ ստեղծագործության համար:

«Հեմիլթոնի» առաջին բեմադրության դերասանական կազմում տարբեր ռասաների ներկայացուցիչներ էին, իսկ Միրանդան գլխավոր դերում էր: 2015 թ. հունվարին մյուզիքլը բեմադրվել է Բրոդվեյից դուրս՝ Նյու Յորքի Հանրային թատրոնում, որտեղ գրանցված հսկայական հաջողությունը արդեն հուլիսին փոխադրել է Բրոդվեյի թատրոն: 2016 թ. «Հեմիլթոնին» շնորհվել է Պուլիցերյան մրցանակ դրամայի անվանակարգում, և այդ նույն տարում այն արժանացել է աննախադեպ 16 «Թոնի» մրցանակների[1]: Մի քանի անվանակարգերում պարգևատրվել է միայն Միրանդան, այդ թվում՝ որպես մյուզիքլում գլխավոր դերի լավագույն դերակատար: 2015թ. «Հեմիլթոնը» ճանաչվել է նաև լավագույն մյուզիքլ, ինչպես նաև լավագույն գիրք: 2016 թ. հուլիսին Միրանդան վերջին անգամ է խաղացել շոուում:

Հեմիլթոնը սկզբում աշխատում է որպես քարտուղար և աչքի է ընկնում գրագրության ոլորտում, ուստի շատերն աջակցում են, որ նա մեկնի ուսումը շարունակելու Նյու Յորքի Քինգ քոլեջում (այժմ Կոլումբիայի համալսարան)՝ մաթեմատիկայի բնագավառում: Այնտեղ ուսանելու տարիներին նա նպատակադրվում է փառքի հասնել` մասնակցելով Անկախության պատերազմին: Պատերազմի վերջին խոշոր ճակատամարտում՝ 1781 թ. Վիրջինիա նահանգի Յորքթաուն քաղաքում ղեկավարում է սվիններով հարձակումը՝ պաշարման մեջ հայտնված բրիտանական ուժերի դեմ:

Պատերազմից հետո Նյու Յորքում Հեմիլթոնը աշխատում է որպես իրավաբան և օգնում է ստեղծելու ԱՄՆ Սահմանադրությունը: ԱՄն փոխնախագահի հետ հիմնադրել է Նյու Յորքի բանկը: Երբ Ջորջ Վաշինգտոնը դարձել է Միացյալ Նահանգների առաջին նախագահը, նա Հեմիլթոնին դարձրել է իր գանձապետարանի քարտուղարը: Այդ պաշտոնում Հեմիլթոնն առևտրային հարաբերություններ է հաստատել Բրիտանիայի հետ, ստրկության դեմ հանդես եկել և ստեղծել առաջին ազգային բանկը:

Իր դրամայում Միրանդան ցույց է տալիս, որ Ալեքսանդր Հեմիլթոնը իսկապես մեծ ներդրում է ունեցել հզոր Ամերիկա ձևավորելու գործում, ինչպիսին այն ճանաչում ենք այսօր: Նա բոլորին օրինակ է ծառայում, թե ինչպես ինքնուրույն ոտքի կանգնել և իրագործել «ամերիկյան երազանքը»