Անդրե Մորուա «Նամակներ անծանոթուհուն»

2014-09-06 5115

Բեռնել գիրքը

► Սիրահարված կնոջն ամոթ բան չէ կոկետուհի ձևանալ, որպեսզի չկորցնի տղամարդու սերը, այնպես ինչպես հիվանդի շահերից ելնելով, գթության քույրը երբեմն ստիպված է անողոք լինել։ Ներարկումը ցավոտ է, բայց բուժիչ։ Խանդը տանջող է, բայց ամրապնդում է զգացմունքը։ ► Ձեր միակ դժբախատությունն այն է, որ դուք ձեզ դժբախտ եք կարծում և ձգտում եք նրան, ինչը չունեք` ձեր ունեցածից հաճույք ստանալու փոխարեն: ► Ոչինչ ավելի շատ չի նյարդայնացնում երիտասարդ տղային, քան այն աղջկա պահանջները` ում հանդեպ նա անտարբեր է: ► Մեծ պատասխանատվություն է լինել հանճարի առաջին սերը... ► Ես ճանաչում եմ մի դեռատի աղջկա, որը հաճույքով երգում էր հյուրերի առջև․ նա շատ գեղեցիկ էր և դրա համար բոլորը նրան մինչև երկինք էին բարձրացնում։ Միայն մի պատանի լռություն էր պահպանում։ - Դե իսկ դուք,- վերջապես չդիմացավ աղջիկը,- Ձեզ դուր չի՞ գալիս թե ինչպես եմ երգում։ - Օ՜հ, ընդհակառակը,- պատասխանեց պատանին,- եթե դուք նաև ձայն ունենայիք, դա պարզապես հիանալի կլիներ։ Հենց նրա հետ էլ ամուսնացավ... ► Կոկետությունը երկսայրի զենք է. այն կվիրավորի նրան, ով, ձեռքն առնելով, անշնորհք շարժում կկատարի։ ► Լինել պահանջկոտ` նշանակում է հետաքրքրել մարդկանց: ► Եթե մենք բոլորս իմանայինք այն ամենը, ինչ ասվում է մեր բոլորիս մասին, ոչ ոք ոչ ոքի հետ չէր խոսի: ► Նվերները պետք է ընտրել նրա համար ում որ դրանք նախատեսված են, այլ ոչ թե նրա` ով ընտրում է դրանք: ► Ներում են կնոջ շատախոսությունը, նրա իրավացիությունը չեն ներում։ ► Սիրել՝ նշանակում է հուզմունք ապրել մի ինչ-որ բանի հնարավորության մտքից, հնարավորություն, որն այնուհետև վերաճում է պահանջի, համառ ցանկության, սևեռուն գաղափարի․․ ► Այն կինը, որը կարդացել և յուրացրել է մի քանի անմահ գործեր, կարող է իրեն ավելի կիրթ համարել, քան նա, ով ցրված ու հարևանցիորեն օրական երեք նորույթ է աչքի անցկացնում: ► Գիրքը պետք է կարդալ մատիտը կամ գրիչը ձեռքին։ Ոչ մի բան այնպես չի ձևավորում ճաշակն ու դատողությունների ճշտությունը, ինչպես դուր եկած հատվածն արտագրելու կամ խորիմաստ միտքը նշելու սովորությունը։ ► Այն մարդը, որը չի կարողանում անմիջապես գտնել պետք եղած էջը, չգիտի հեղինակին: ► Սիրահարված տղամարդուն իր ընտրյալից չես կտրի՝ վերջինիս վատաբանելով։ Նա տղամարդուն հմայիչ է թվում, եթե դուք ասեք որ դա այդպես չէ, նա կորոշի, որ ոչ թե ինքն է խաբվում, այլ դուք չեք կարողանում ճշմարտության աչքերին նայել, իսկ գլխավորը՝ չեք ուզում դա անել, որովհետև սաստիկ խանդում եք․․․ ► Դուք գիտեք, որ կինը կարող է լինել իր կամ անձ: Նա անձ է, եթե անկախություն է պահպանում այն տղամարդուց, որին սիրում է, ինքնուրույն է իր հայացքներում ու պլաններում, իր մարմնի ու մտքերի տիրուհին է :Նա իր է, եթե թույլ է տալիս վարվել իր հետ ինչպես իրի հետ, թեկուզ գեղեցիկ ու թանկարժեք, բայց այնուամենայնիվ զուրկ սեփական կամքից, հնազանդն իր տիրոջ ցանկություններին ու քմահաճույքներին՝ ինչպես համեղ կերակրատեսակ, որով հյուրասիրվում են, երբ ցանկություն է առաջանում: ► Եթե դու դադարես ամուսնուդ համար գաղտնիք լինել, նա կսկսի որոնել այն ուրիշ տեղում․․․ ► Պատմությունը մեզ հուշում է, որ ամենից շատ սիրել են այն կանանց, ում հազվադեպ են տեսել: ► Թանկագինս, զգուշացեք չափից դուրս քաղաքավարությունից: Այդ հատկությունն ստիպում է թե տղամարդկանց, թե կանանց ավելի շատ հիմարություններ կատարելու, քան ամենավատ թերությունները: ► Եթե դուք հենց նոր եք կորցրել ձեր սիրուհուն, անմիջապես մի նստեք վեպ գրելու։ Վերքը դեռևս արյունահոսում է, այն պետք է վիրակապել, այլ ոչ թե փորփրել։ Երբ այն կփակվի, դուք դառը հաճույք կզգաք նրան հպվելով։ Ցավն այնքան ուժեղ չի լինի, որ ձեզանից տնքոց կորզի, սակայն ձեզ երգել տալու համար վերքը դեռ երկար կմրմռա․․․ ► Ոչ ոք ի վիճակի չէ ամբողջ օրը, իսկ առավել ևս շաբաթներ կամ տարիներ շարունակ ապրել քնքուշ կրքի մթնոլորտում։ Ամեն ինչ հոգնեցնում է, նույնիսկ այն, որ քեզ սիրում են: ► Աշխարհում ավելի սքանչելի բան չկա, քան այն ամուսնությունը, որում ամեն ինչ ընդհանուր է՝ սերը, հոգևոր հետաքրքրությունները, հաղթանակներն ու պարտությունները․․․ ► Երբեք ձեր մասին վատ բաներ չխոսեք: Դա կանեն ձեր բարեկամները: ► Չափահասները շատ հաճախ ապրում են երեխաների կողքին՝ չփորձելով հասկանալ նրանց աշխարհը: Մինչդեռ երեխան լարված ուշադրությամբ հետևում է իր ծնողների աշխարհին, ձգտում հասկանալ և գնահատել այն. փոքրիկի ներկայությամբ անզգուշորեն արտասանված խոսքերը յուրացվում են նրա կողմից, յուրովի մեկնաբանվում և ստեղծում աշխարհի որոշակի պատկեր, որը երկար կպահպանվի նրա երևակայության մեջ: ► Բարոյական խրատ՝ ձեզ բնական պահեք և, եթե ձեզ հստակ է, մի քիչ գեղեցկորեն: Դրա համար ձեզանից շնորհակալ կլինեն: ► Քաղաքներում մենք առանց ափսոսանքի վատնում ենք մեր փոքրաթիվ՝ անգին ու անկրկնելի օրերը,մենք աչքաթող ենք անում, որ մեր կյանքն ընդամենը մի ակնթարթ է և անհրաժեշտ է այդ կարճատև ակնթարթը դարձնել հնարավորին չափ ավելի գեղեցիկ ու կատարյալ: ► Մարդկային ցեղի շատ ներկայացուցիչներ ստեղծված են այնպես, որ հեշտությամբ են ընտելանում սիրված լինելուն և թանկ չեն գնահատում այն զգացմունքը, որում չափազանց վստահ են: ► Շատ իրադրություններում լինում է մի այնպիսի՝ միակ րոպե, երբ ձեր ընդունած որոշումից կախված կլինի ձեր կյանքի ողջ ընթացքը: ► Հարմար առիթը հազվագյուտ է երկու անգամ ներկայանում: ► Մինչ մենք կյանքը հետաձգում ենք վաղվան, այն անցնում է: Հ.Գ. Եթե դուք ունեք մեջբերումներ` դուրս բերված այս գրքից, ապա կարող եք ուղարկել մեզ հետադարձ կապով:

մեկնաբանություններ