Արամ Ավետիս «Կույր կետադրություն»

2018-10-16 1363

► Չկարդացված գիրքը նման է լռող մարդու:

► Բոլոր մեծ մտածողները գիտեին, որ գրելուց այլանդակ բան չկա այս աշխարհում:

► Փայլը քո աչքերի ինձ ստիպում է վերադառնալ տուն, որի հիմքը ճահճի մեջ է:

► Անցյալը երեկվա այսօրն է:

► Մրադն իր մարմնի կենտրոնում մի փոքր անցք ունի, որով սնվել է մոր մարմնում: Դա նրա երրորդ աչքն է: Այսինքն` աչքի գաղափարը տեսնելու մեջ չէ, այլ սնելու:

► Չմոռանանք, որ գրականությունը սկսվեց հենց կույր աչքով:

► Իմ ոճի մեջ է ամփոփված իմ մենությունը:

► Երազը մահկանացուների համար է: Երազը մեզ դրա մասին հիշեցնելու համար է:

► Ժամացույցը աչքն է, իսկ հայացքը` ժամանակը:

► Մենք շատ քիչ ենք, բայց շատ է մեր քիչը:

► -Հիվանդը,-ասաց բժիշկս,-հարցին` տեսնում է, պատասխանում է` ոչ, սակայն, եթե խնդրես նրան նկարագրել դիմացը դրված իրը, նա կանի` բավականին հստակ և ճիշտ բնութագրելով: Այն հարցին, թե նա ինչպես կարողացավ, հատկապես, որ պնդում էր, թե չի տեսնում, նա շատ հաճախ պատասխանում է, որ ուղղակի գուշակեց:
-Հասկացա՞ր,-հարցրեց բժիշկս:
-Ոչ,-պատասխանեցի ես և դուրս եկա սենյակից:

► Պատմի'ր` ինչպես են գործերդ Հայկական լեռնաշխարհում` ոգու գագաթների մեջ:

► «Ապրելը վնասակար է առողջությանը»,-մտածեցի ես` բացելով նամակը:

► Բառերից դուրս չկա գրականություն:

► Գրողի համար Բառը դրսից թանգարան է, ներսից` տուն:

► Եթե հաշվի առնենք, որ մարդու կյանքի միջին տևողությունը 70 տարին է, ապա եթե երկու տարեկանից անգամ սկսենք Բորխես կարդալ, արդեն իսկ շատ ուշ կլինի: Եվ ընդհանրապես, միշտ ուշ է կարդալու համար:

► Երեկվա օրորվ ապրող մարդը Վաղվա օրվա մարդասպանն է:

► Փողոցում հանդիպում ես հին ծանոթիդ և ուզում ես, որ նա քեզ չնկատի, որովհետև դու մոռացել ես կամ հատուկ կորցրել ես քո հին Ես-ը և չես ուզում կրկին նրա հետ հանդիպել: Իսկ հին ծանոթդ խոսում է հետդ այնպես, ասես դու դեռ այն հին Ես-ն ես և ոչինչ չի փոխվել քո մեջ: Երևի նա վախենում է ընդունել, որ ժամանակն  անցնում է, որ ես արդեն այն չեմ, ինչ կայի, բայց, իմանալով նրա վախերի մասին, ես խոսում եմ այնպես, ասես ոչ մի տեղ չեմ էլ գնացել և չեմ փոխվել: Նա զգում է իր առավելությունն իմ նկատմամբ: Թող զգա, ես թքած ունեմ: Ինձ դժվար չէ նրա համար դերասան լինելը:

► Կանայք տխուր ծխում են, որպեսզի վերականգնեն իրենց ազատությունը, որպեսզի իրենց ազատությունը ապացուցեն...

 

մեկնաբանություններ