Գրքամոլ Ակումբ. Քննարկում տասներկու. Թեոդոր Դրայզեր «Պատվար»

2015-03-22 3111

Մարտի 20, ուրբաթ, Ավ. Իսահակյանի անվ. գրադարանում տեղի ունեցավ Գրքամոլ Ակումբի «առաջին մակարդակի» վերջին հանդիպումը: Գրքամոլները քննարկում էին ամերիկացի հայտնի գրող, հասարակական գործիչ Թեոդոր Դրայզերի ամենահայտնի գործերից մեկը՝ «Պատվար»-ը: Գրքում մի դժբախտ ընտանիքի օրինակով ներկայացված է շատ ընտանիքներին բնորոշ դրաման, ծնողների և զավակների սերուդների բախումները, նրանց միջև գոյություն ունեցող անհաղթահարելի պատնեշը և դրանից բխող անդառնալի հետևանքները: Քննարկումն ընթացավ բավականին հետաքրքիր մթնոլորտում, գիրքը բովադակալից էր, ասելիքը՝ շատ, թեման հարազատ էր ներկաներից յուրաքանչյուրին, քանի որ յուաքանչյուրն էլ իր կյանքի ընթացքում քիչ թե շատ առնչվել էր գրքում նկարագրված իրավիճակներին: Քննարկման առաջին մասում, երբ անդամները հերթով իրենց կարծիքին էին արտահայտում գրքի մասին, գրեթե բոլորը միաձայն մեղադրում էին գրքում նկարագրված ընտանիքի ծնողներին` երեխաներին հասարակությունից կտրելու, չհասկանալու, նրանց հրարավորությունները սահմանափակելու և այլնի մեջ: Սակայն քննարկման երկրորդ փուլում քննարկման կազմակերպիչները փոքրիկ էքսպերիմենտ անցկացնելով քննարկման մասնակիցներին բաժանեցին երկու խմբի՝ «ծնողների» և «զավակների»: Խմբերից յուրաքանչյուրին տրվեց ժամանակ «հակառակորդ» խմբին երեքական մեղադրանք առաջադրելու համար, ինչից հետո ևս որոշ ժամանակ տրամադրվեց առաջադրված մեղադրանքներից պաշտպանվելու համար: «Ծնողներ» խմբի անդամները, ովքեր մինչ խմբի մեջ միավորվելը ակտիվորեն մեղադրում էին Բարնսենրի ընտանիքի հորն ու մորը՝ ընտանիքի հետ պատահած բոլոր դժբախտությունների մեջ, այժմ «ստիպված» էին մի կողմից պաշտպանվելու և մյուս կողմից էլ մեղադրանքներ առաջադրելու «զավակներին»: Արդյունքները բավականին հետաքրքրական էին: Ընդամենը 30 րոպեների ընթացքում քննարկման մասնակիցները կարողացան այլ տեսանկյունից նայել իրերին, վեր հանել և քննարկել ոչ միայն ծնողների, այլև զավակների սխալները, արդյունքում ստացվելով բավական հետաքրքիր և օգտակար քննարկում:

Այսպիսով, ամփոփելով Գրքամոլ Ակումբի «առաջին մակարդակը», վստահ կարող ենք ասել, որ այն դրական անդրադարձավ ակումբի անդամների ընդհանուր զարգացվածության մակարդակի և մտածելակերպի վրա: Այժմ Գրքամոլները անցան Ակումբի «երկրորդ մակարդակ», որտեղ նրանք կուսումնասիրեն 6 հեղինակի և դրանցից յուրաքանչյուրի հայտնի ստեղծագործություններից մեկը՝ շեշտադրումը դնելով հեղինակի կյանքի, ուսման, ստեղծագործական գործունեության և փիլիսոփայության վրա:

Առաջիկա քննարկվելիք հեղինակը Ջորջ Օրվելն է, ստեղծագործությունը՝ «1984» -ը:

Բոլոր նկարներն՝ այստեղ:

մեկնաբանություններ