Գրքամոլ Ակումբ. Խումբ 8. Հանդիպում II. Նիկոլայ Գոգոլ «Մեռած Հոգիներ»
2021-04-11 972
Ապրիլի 3-ին Ավ․ Իսահակյանի անվան Կենտրոնական գրադարանում տեղի ունեցավ «Գրքամոլ» ակումբի 8-րդ խմբի 2-րդ հանդիպումը։ Քննարկման գիրքն էր ռուս արձակագիր, դրամատուրգ, բանաստեղծ Նիկոլայ Գոգոլի «Մեռած Հոգիներ» պոեմը։ Այս ստեղծագործությամբ Գոգոլը ստեղծել է ճորտատիրական-կալվածատիրական Ռուսաստանի ամբողջական պատկերը: Յուրաքանչյուր հերոսի կերպարում բացահայտել է իշխող դասի բարոյական անկումն ու հոգու աղքատացումը: Պոեմում հեղինակը ներկայացրել է ժամանակի ռուսական իրականությունը և ներկայացրել ռուս ժողովրդին:
Հանդիպման սկզբում անդամները ներկայացրեցին հետաքրքիր փաստեր հեղինակի և ստեղծագործության մասին։ Նշանակալից փաստերից մեկը, որը արժե առանձնացնել, այն է, որ «Մեռած հոգիների» երկրորդ հատորը այդպես էլ չի հրատարակվել, քանի որ րոպեական պոռթկման ժամանակ՝ մահից առաջ, Գոգոլն այն նետել է բուխարին և վառել։
Այնուհետև, արդեն ստեղծագործության քննարկման ընթացքում խոսվեց գլխավոր հերոսների կերպարների խառնվածքի, նրանց բարոյական արժեքների, բնավորության հատկությունների մասին։ Անցկացվեցին համեմատականներ մեր օրերի հետ, հնչեցին կարծիքներ, որ Նիկոլայ Գոգոլի ժամանակից ի վեր, բացի դեկորացիայից, ոչինչ չի փոխվել, շատերը դեռ ունեն նույն «Մեռած հոգիները», և որ դեռ ապրում ենք այնպիսի հասարակության մեջ, որտեղ շատ են Չիչիկովները, Սոբակևիչները, Մանիլովները․․․ մարդիկ, ովքեր ամեն գնով փորձում են հնարավորինս շատ քամել ուրիշներից և վաստակել աշխարհի գումարները։
Քննարկվեց նաև Գոգոլի գրելաոճը, լեզվական հնարքները, որոնք հարստացնում են ստեղծագործությունը:
Կարծիքները և՛ հեղինակի, և՛ ստեղծագործության վերաբերյալ տարատեսակ էին, և մասնակիցները ջերմ մթնոլորտում սիրով կիսվում և պարզաբանում էին իրենց տեսակետները։
Ակումբականներից մի քանիսին էլ դուր չէր եկել գիրքը՝ պատճառաբանելով ձանձրալի նկարագրություններն ու գրքի ոչ հետաքրքիր սյուժեն:
Հաջորդ հանդիպումը նախատեսվում է ապրիլի 17-ին, որի ժամանակ քննարկվելու է Գաբրիել Գարսիա Մարկեսի «Գնդապետին գրող չկա» վիպակը։
Հ.Գ. Հանդիպման բոլոր նկարներն՝ այստեղ:
Դիտեք ավելին Գրքամոլ Ակումբ բաժնում
մեկնաբանություններ