«Թող յուրաքանչյուրն այս կյանքում գտնի իր գիրքը». Արձագանքներ Գրքամոլի մասին-Hartak.am

Շատերիս է ծանոթ «Գրքամոլ» անունը, գրեթե ամեն օր մենք հետևում ենք ֆեյսբուքյան «Գրքամոլ» էջի հետաքրքիր, մի փոքր մոռացված գրքերից հատվածներին, հավանում ենք և կիսվում մեր և մեր ընկերների էջերին: «Մարդը ստեղծված է այն գրքերից, որոնք կարդացել է». սա է «Գրքամոլ» (http://grqamol.am) նախաձեռնության կարգախոսը, որը հասցրել է հազարավոր օգտատերերի սիրելի էջը դառնալ: Մեր զրուցակիցներն են Գրքամոլ էջի նախաձեռնող անդամները` Հասմիկ Մելիքսեթյանը, Համլետ Մուրադյանը, Հռիփսիմե Ռոստոմյանը. «Մեր նպատակն է բարձրացնել հասարակության մեջ սերը դեպի ընթերցանությունը, առաջացնել հետաքրքրություն դեպի դասական և արդի գրականությանը, ինչպես նաև կոտրել բոլոր այն կարծրատիպերը, թե այսօրվա հայ իրականության մեջ ընթերցողներ չկան»: Ո՞րն է Գրքամոլ էջի նպատակը, առաքելությունը, որո՞նք են հիմնական սկզբունքերը: Մեր էջի նպատակն է ապացուցելը, որ մեր երիտասարդությունը կարդում է, զարգացած է, ընթերցասեր է, ԳՐՔԱՄՈԼ է։ Ի սկզբանե, էջը բացել ենք հենց այս նպատակով: Առաքելությունը գրքերի, ընթերցանության հանդեպ հետաքրքրություն և սեր առաջացնելն է, կամ դա խորացնելը: Ասում են չէ` սիրեք գրքեր. այդ սերը թեկուզ հնաոճ է, բայց այն միշտ փոխադարձ է: Ամեն գիրք իր ասելքին ունի, յուրաքանչյուրի համար յուրովի է ասելիքը, մենք փորձում ենք սա ցույց տալ այն մարդկանց, ովքեր դա դեռ չեն զգացել: Եվ ասեմ, որ իրականում դա մեզ հաջողվում է: Դրա մասին են խոսում այն բազմաթիվ նամակները, որոնք ստանում ենք մեր ընթերցողներից, որոնք շատ հաճախ ունեն հետևյալ բովանդակությունը` «շնորհակալություն, դուք մեզ սովորեցրիք սիրել գիրքը և ձեր շնորհիվ սկսել ենք գրքեր կարդալ»։ Այսպիսի նամակները մեզ համար ամենամեծ գնահատականն են դառնում: Ինչ վերաբերում է սկզբունքներին, մի բան կարող եմ նշել, որ մեր հիմնական սկզբունքն է հավատարիմ մնալ ինքներս մեզ, չնմանվել, չկեղծել: Ովքե՞ր են այս հրաշալի նախաձեռնության անդամները: Երեքով ենք աշխատում` իրավաբան, ֆիզիկոս, մանկավարժ։ Գուցե տարօրինակ թվա մեր մասնագիտությունները, բայց մեզ միավորում է ընդհանուր հոբբին, այսպես երևի մեկնաբանեմ: Հեղինակներին ի՞նչ սկզբունքով եք ընտրում, ի՞նչ հաճախականությամբ եք տեղադրում հրապարակումները: Մեջբերումները տեղադրում ենք այն գրքերից, որոնք ինքներս ենք կարդում, իսկ թե ինչպես ենք այդ գրքերը ընտրում, դժվարանում եմ պատասխանել, կարծում եմ ավելի շատ ճաշակի խնդիր է: Սակայն, երբեմն, հարցումներ ենք անում, թե որ հեղինակների մտքերը կուզեին տեսնել մեզ մոտ ընթերցողները, կամ որ գրքերից մեջբերումներ, որոնք էլ իհարկե հաշվի ենք առնում: Գրախանութների հետ կապը ինչպե՞ս եք պահպանում, ի՞նչ հաճախականությամբ եք այցելում գրախանութ կամ գրադարան: Ըստ անհրաժեշտության: Նշեմ, որ վերջերս (ԳՐՔԱՄՈԼ: Գրքերի փոխանակում խումբը բացելուց հետո) թե՛ գրախանութ, թե՛ գրադարան այցելելու անհրաժեշտությունը պակասել է, քանի որ հաճախ պետք եկած գիրքը կարողանում ենք փոխանակել ինչ-որ մեկի հետ, սա և՛ հարմար է, և՛ օգտակար։ Ի՞նչ գիրք եք այժմ ընթերցում: Մեզնից յուրաքանչյուրը հիմա առանձին-առանձին կարդում է՝ Էռնեստ Հեմենգուեյ «Հրաժեշտ զենքին», Ալբերտո Մորավիա «Արհամարհանք» և Ֆրենսիս Սքոթ Ֆիցջերալդ «Մեծն Գեթսբին» գրքերը: Համամի՞տ եք այն կարծիքի հետ, որ Հայաստանում քիչ են կարդում և արդյո՞ք ընթերցողները փոքրամասնություն են կազմում մեզ մոտ: Միանշանակ ոչ: Արդեն նշեցինք, որ մեր նպատակն է ապացուցել, որ մեր հայ երիտասարդությունը սիրում է կարդալ, և կարծում եմ, դատելով մեզ հետևող անձանց քանակից, կարող ենք փաստել, որ մենք դա ապացուցել ենք: Չկա մի հասարակություն, որտեղ բոլորը կարդան: Չե՞ք ցանկանում արդյոք կազմակերպել գրական քննարկումներ: Նման քննարկումներ պարբերաբար մեր էջում կազմակերպվում են: Բայց կան մտքեր, ուզում ենք դրանք իրական դաշտ տեղափոխել, սակայն սա դեռ ապագայի պլաններ են, պետք է այդ ամենը լավ մտածել և կազմակերպել: Առաջիկայում ի՞նչ հետաքրքիր նախաձեռնություններ և ծրագրեր ունեք: Մինչև Նոր Տարի մեծ անակնկալ ունենք մեր Գրքամոլների համար, սակայն փակագծերը բացել չեմ ուզում, հետևեք մեզ և անպայման կիմանաք այդ մասին: Չե՞ք ցանկանում արդյոք ընդլայնել ձեր շրջանակները. դուրս գալ ֆեյսբուքյան էջի սահմաններից և սկսել համագործակցություններ նաև այլ գրական ակումբների հետ, ինչպես նաև կազմակերպել այլ միջոցառումներ, կարծում եմ ունեք բոլոր հնարավոր նախադրյալները: Կան նման ծրագրեր, բայց այդ ամենը կախված է ժամանակից: Կոնկրետ ունենք մի քանի ծրագիր, որ պատրաստվում ենք իրականացնել, բայց դա ոչ մոտ ապագայի հարց է, ուստի չէի ցանկանա խոսել այդ մասին: Ըստ Գրքամոլների՝ որո՞նք են ընթերողների ամենասիրելի գրքերը, նշեք հնգյակը: Օ, շատ բարդ հարց է, քանի որ այս դարում, երբ չկա գրաքննություն, չկան արգելված գրքեր, ընթերցողնեը ընտրելու լայն հնարավորություն ունեն, և ըստ այդմ էլ ճաշակները տարբեր են: Ամեն դեպքում փորձեմ. 1. Էրիխ Մարիա Ռեմարկ- Հաղթական կամար 2. Գաբրել Գարսիա Մարկես – Հարյուր տարվա մենություն 3. Օսկար Ուայլդ - Դորիան Գրեյի դիմանկարը 4. Պաուլո Կոելյո – Ալքիմիկոսը 5. Անտուան դը Սենտ-Էքզյուպերի – Փոքրիկ Իշխանը Սա միանշանակ չէ, պարզապես փորձեցինք ներկայացնել այն գրքերը, որոնց մասին հաճախ են հարցնում ընթերցողները: Եվ վերջում, ի՞նչ կմաղթեք մեր ընթերցողին: Ասում են, եթե չես սիրում գրքեր, ուրեմն դեռ չես կարդացել այն մեկը, որը քեզ անհրաժեշտ է: Ուստի մեր ամենամեծ մաղթանքը թող լինի այն, որ յուրաքանչյուր մարդ այս կյանքում գտնի իր գիրքը:  

Աղբյուրը՝ hartak.com