Հայկուներ Բորխեսից

1

Ինչ-որ բան ասացին ինձ

երեկոն ու լեռը:

Արդեն կորցրել եմ դա:

2

Անսահման գիշերն

այլ բան չէ հիմա,

քան մի բույր:

3

Սա՞ է, թե՞ ոչ

երազը, որ մոռացա

լուսաբացից առաջ:

4

Լռում են լարերը:

Երաժշտությունը գիտեր՝

ինչ եմ ես զգում:

5

Ինձ չեն ուրախացնում այսօր

այգու նշենիները:

Քո մասին հիշողությունն են:

6

Մթնակերպ

գրքեր, թղթեր, բանալիներ

հետևում են իմ ճակատագրին:

7

Այն օրվանից

չեմ տեղաշարժել քարերը

տախտակի վրա:

8

Անապատում

ծագում է այգը:

Ինչ-որ մեկը գիտի դա:

9

Անգործ սուրը

երազում է իր մարտերի մասին:

Այլ է իմ երազանքը:

10

Մարդը մահացել է:

Մորուքը չգիտի:

Աճում են եղունգները:

11

Սա ձեռքն է,

որ երբևէ դիպել է

վարսերիդ:

12

Ծածկի տակ

հայելին չի պատճենում

ավելին՝ քան լուսինը:

13

Լուսնի տակ

ստվերը, որ երկարում է,

միակն է:

14

Կայսրությո՞ւն է

այս լույսը, որ մարում է,

թե՞ լուսատտիկ:

15

Նորալուսինը:

Նա ևս նայում է նրան

այլ դռնից:

16

Հեռվում՝ դայլայլ:

Սոխակը չգիտի,

որ սփոփում է քեզ:

17

Զառամյալ ձեռքը

շարունակում է տողեր գրել

մոռացության համար:

Թարգմանությունն իսպաներենից՝ © Աղավնի Գրիգորյանի