Մեկնարկել է «Կոկա-Կոլա Հելլենիկ Արմենիայի» «Երիտասարդների զարգացում 2020» ծրագիրը

Մեկնարկել է «Կոկա-Կոլա Հելլենիկ Արմենիայի» «Երիտասարդների զարգացում 2020» ծրագիրը

#ԲացահայտիրԶարգացիրՀաղթիր՝ «Կյանքի հմտություններ» և «Բիզնես հմտություններ» անվճար դասընթացաշար երիտասարդների համար

30 հունիսի, 2020, Երևան

 «Կոկա-Կոլա Հելլենիկ Արմենիա» ընկերությունը կարևորում է կրթության և գիտության ոլորտներում իր ներդրումը՝ ուղղված երիտասարդների զարգացմանը։  Որպես հասարակության պատասխանատու անդամ՝ «Կոկա-Կոլա Հելլենիկ Արմենիա» ընկերությունն իր պարտքն է համարում նպաստել երիտասարդների կրթության հնարավորությունների ընդլայնմանն ու մասնագիտական հմտությունների զարգացմանը:

Վերսկսելով «Երիտասարդների զարգացում» ծրագիրը՝ «Կոկա-Կոլա Հելլենիկ Արմենիա» ընկերությունը 16-30 տարեկան երիտասարդներին հնարավորություն է ընձեռում մասնակցել «Կյանքի» և «Բիզնես» հմտություններ դասընթացաշարին՝  զարգացնելու ինչպես անձնական ու մասնագիտական հմտությունները, այնպես էլ առհասարակ ինքնակրթությունը: Հաշվի առնելով համավարակով պայմանավորված  իրավիճակը և պահպանելով անվտանգության կանոնները՝ դասընթացաշարը հասանելի է առցանց տարբերակով՝ Dasaran.am կրթական հարթակում:

Դասընթացների թվայնացումը և օնլայն հարթակում հասանելիության ապահովումն այս այս տարի իրականացնում է ծրագրի գործընկեր Dasaran կրթական ծրագիրը, որի առաքելությունն է կրթական հավասար հնարավորությունների ապահովումը։

Երիտասարդության զարգացման եռամյա ծրագիրը մեկնարկել է 2018 թվականին՝ 2017 թվականին ՀՀ կրթության և գիտության նախարարության և «Կոկա-Կոլա Հելլենիկ Արմենիա» ընկերության միջև ստորագրված փոխըմբռնման հուշագրի շրջանակում և միտված է խթանել զբաղվածությունը Հայաստանում:

Հայաստանում բնակվող ավելի քան 4600 երիտասարդ արդեն իսկ բացահայտել է «Կյանքի հմտություններ» և «Բիզնես հմտություններ» դասընթացների գործիքները: «Կոկա-Կոլա Հելլենիկ Արմենիա» ընկերությունը կարևորում է երիտասարդների մասնագիտական ներուժի բացահայտումը և շարունակում է ընդլայնել ծրագրի զարգացման նոր հնարավորությունները:

Այս տարվա ընթացքում իրականացվող «Կյանքի հմտություններ» և «Բիզնես հմտություններ» անվճար դասընթացներին մասնակցելու համար երիտասարդները կարող են անցնել հետևյալ հղումով՝ https://www.dasaran.am/cola։

«Երիտասարդների զարգացում» ծրագրի՝ «Կյանքի հմտություններ»  մոդուլի շրջանակում մասնակիցները ձեռք են բերում ինքնազարգացման և ինքնագնահատման կարողություն, ինչպես նաև մասնագիտական կապերի ստեղծման, հետադարձ կապի, ուղեկցող նամակ և CV գրելու, գործատուին ներկայանալու հմտություններ: «Բիզնես հմտություններ» մոդուլի մասնակիցները սովորում են ժամանակի և նախագծերի կառավարման, հաղորդակցման, բանակցային և վաճառքի հմտություններ, բիզնես պլանավորում, ինչպես նաև ֆինանսական գրագիտություն:

Դասընթացների ավարտին մասնակիցները կստանան անվանական հավաստագրեր: