Ոմանք ստեղծված են սիրելու համար, իսկ ոմանք էլ՝ պարզապես ապրելու| Ալբեր Կամյու
2021-10-14 464
Ոմանք ստեղծված են սիրելու համար, իսկ ոմանք էլ՝ պարզապես ապրելու։ Ֆրանսիացի հայտնի փիլիսոփա և գրող Ալբեր Կամյուն ամուսնացել է երկու անգամ։ Առաջին կինը նրա հայրենակցուհի, համակուրսեցի Սիմոնե Հին էր: Զույգն ամուսնալուծվել է փոխադարձ համաձայնությամբ՝ Սիմոնեի՝ մորֆինից կախվածության և պարբերական դավաճանությունների պատճառով։ Երկրորդ անգամ Կամյուն ամուսնացել է ալժիրցի ֆրանսուհի Ֆրանսին Ֆողի հետ։ Թեև Ֆրանսինը մասնագիտությամբ մաթեմատիկ էր, այդուհանդերձ նրա անհատականությունը պարուրված էր արվեստով։ Հենց նրա հիասքանչ դաշնամուրային կատարումներն էլ` Շոպենից մինչև Շուման, հիացրել են Կամյուին և գերել նրա սիրտը։ Սակայն ըստ որոշ վարկածների՝ Կամյուն ամուսնացել է Ֆրանսինի հետ իր հիվանդության պատճառով՝ խնամքի և հոգատարության կարիքից ելնելով: Մի անգամ Կամյուն նույնիսկ խոստովանել է, որ Ֆրանսինի հետ իր ամուսնությունը ոչ մի կապ չի ունեցել սիրո հետ: Սակայն այդ ամուսնությունը ևս երկար չի տևել։ Կամյուն հավատարիմ չէր Ֆրանսինին։ Որոշ ժամանակ անց նա տարվել է իսպանացի դերասանուհի Մարիա Կազարեսով և ի վերջո որոշել լքել Ֆրանսինին ու երկվորյակ երեխաներին։ Ֆրանսինի համար չափազանց ծանր էր տեսնել Կամյուի մոլուցքը Մարիա Կազարեսի հանդեպ։ Նա այդպես էլ չի համակերպվել այդ մտքին. անգամ ինքնասպանության փորձ է արել` ցած նետվելով չորրորդ հարկի պատուհանից: Չնայած տասնհինգ կոտրվածքներին՝ Ֆրանսինը շարունակել է ապրել։ Այս իրադարձություններից հետո Կամյուն հաճախադեպ խղճի խայթից անգամ որոշել է վերադառնալ Ֆրանսինի ու երեխաների մոտ, սակայն Կազարեսի հանդեպ ահագնացող սերը այդպես էլ հանգիստ չի թողել գրողին, և ի վերջո նա իրեն ամբողջովին նվիրել է Մարիային։ Սակայն Կամյուի՝ երջանիկ ապագայի մասին պատկերացումներն այդպես էլ չեն իրականանում։ 1960 թվական, Ֆրանսիա… մեքենան բախվում է ծառին և ֆրանսիացի գրող ու փիլիսոփա Ալբեր Կամյուն մահանում է ավտովթարից:
© Նյութի հեղինակ՝ Ֆլորա Օհանյան
Դիտեք ավելին Հետաքրքրի մասին բաժնում
մեկնաբանություններ