10 հետաքրքիր փաստ Էռնեստ Հեմինգուեյի մասին

1. Էռնեստ Հեմինգուեյն ու քույրը՝ Մարսելինը, մեծացել են որպես երկվորյակներ, թեև քույրը մեծ էր Էռնեստից 18 ամսով։ Սա երեխաների մոր ցանկությունն էր, ով Էռնեստին մինչև երեք տարեկանը աղջկա հագուստ է հագցրել, երկար է պահել նրա մազերը, և մինչև 6 տարեկանը Էռնեստը կարճ սանրվածքներ չի ունեցել։ Մարսելինին նույնիսկ ուշ են ընդունել դպրոց, որպեսզի նա և Հեմինգուեյը կարողանան նույն դասարանում սովորել:

2. Կատուները, մասնավորապես պոլիդակտիլային կատուները, որոնք տարբերվում են սովորական կատուներից ու յուրաքանչյուր ոտքի վրա կարող են ունենալ վեց կամ ավելի շատ մատներ, գրողի սիրելի կենդանիներն են եղել։ Հեմինգուեյն ունեցել է 23 կատու, որոնց անվանակոչել է ի պատիվ իր հայտնի ժամանակակիցների։

3. Էռնեստ Հեմինգուեյը հմուտ ձկնորս է եղել։ 1935 թվականին Բահամյան կղզիներ կատարած իր ճանապարհորդության ժամանակ նա որոշել է ձկնորսության մեջ նոր փորձարկում կատարել և ավտոմատից կրակել է շնաձկների վրա, որպեսզի նրանք չխժռեն իր որսը: Այս ռազմավարությունը ակնհայտորեն ձախողվել է, քանի որ իր կողմից սպանված շնաձկների արյան հետքերով այլ շնաձկներ են մոտեցել ծովի այդ հատվածը։
Որպես փորձագետ ձկնորս՝ 1938 թվականին նա սահմանել է համաշխարհային ռեկորդ՝ մեկ օրում բռնելով յոթ մարլին (ձկան տեսակ):

4. Հավանայում գտնվելու ժամանակ Էռնեստ Հեմինգուեյը հորինել է մի խմիչք, որը կոչվում է Papa Doble: Լրագրողներն ու այցելուները նշումներ են արել կոկտեյլի բաղադրատոմսի մասին, ըստ որոնց կոկտեյլը պատրաստվում է սպիտակ ռոմի, կես լայմի, երկու ճաշի գդալ թուրինջի հյութի և մարաշչինո բալի համադրությամբ։

5. Էռնեստ Հեմինգուեյը ստացել է «Պապ» մականունը, որով նրան դիմում էին անգամ իր ավագ ընկերները։ Այս մականվանն արժանացել է այն պատճառով, որ շատ է օգնել իր ընկերներին և իր արարքներով միշտ օրինակ է եղել ընկերների համար։

6. 1954 թվականին աֆրիկյան սաֆարիում Հեմինգուեյը երկու օրում ենթարկվել է երկու ավիավթարի և երկուսից էլ փրկվել է։ Առաջին վթարը պատահել է, երբ իրեն ու կնոջը տեղափոխող միաշարժիչ Cesna-ն հարկադրված վայրէջք է կատարել իբիսների (երկար, կոր կտուցներով ջրային թռչուններ) երամին չբախվելու համար։ Բուժօգնություն ստանալու նպատակով հաջորդ օրը մեկ այլ փոքր ինքնաթիռ են նստել, որը վերելքի ժամանակ տեխնիկական պատճառներով բռնկվել է։ Պատահարների հետևանքները եղել են ողնաշարային սկավառակների երկու ճաքը, երիկամի և լյարդի պատռվածքը, ուսի տեղաշարժն ու գանգի վնասվածքը։

7. Էռնեստ Հեմինգուեյը գրել է կանգնած վիճակում։ Նա հաճախ ժամեր է անցկացրել նույն դիրքում՝ միայն երբեմն շարժվելով, որպեսզի քաշը մեկ ոտքից մյուսը տեղափոխի։

8. Էռնեստ Հեմինգուեյի գրչին է պատկանում ամենատխուր ու ամենակարճ պատմությունը, որը բաղկացած է ընդամենը վեց բառից։
Պատմությունը հետևյալն է․ «Վաճառվում են մանկական կոշիկներ՝ երբեք չհագած»:

9. Հեմինգուեյը գիրք է նվիրել իր չորս կանանցից յուրաքանչյուրին․ «Եվ ծագում է արևը (Ֆիեստա)» նվիրել է առաջին կնոջը՝ Էլիզաբեթ Հեդլի Ռիչարդսոնին, «Մահ կեսօրին» նվիրված է երկրորդ կնոջը՝ Փոլին Փֆայֆերին, «Ո՞ւմ մահն է գուժում զանգը» նվիրել է երրորդ կնոջը՝ Մարթա Գելհորնին և վերջին կնոջը՝ Մերի Ուելշին է նվիրել «Գետի և ծառերի միջով» գործը։

10. 1960 թվականին առողջական խնդիրները գրողին հասցրել են դեպրեսիայի, նրա մոտ սկսել է զարգանալ պարանոյա։ Նրան պառկեցրել են հիվանդանոց այլ մարդու անունով և սկսել են բուժել էլեկտրաշոկային թերապիայի միջոցով, սակայն դա դրական չի ազդել հեղինակի բուժման վրա։ Թերապիայի 13 սեանսից հետո Հեմինգուեյը կորցրել է հիշողությունը, իսկ հետո՝ ստեղծագործելու ունակությունը։
1961 թվականի հուլիսի 2-ին, հիվանդանոցից դուրս գրվելուց հետո, գրողը վերցրել է իր սիրելի ատրճանակը և ինքնասպան եղել սեփական տանը։

© Նյութի հեղինակ՝ Եսթեր Սարգսյան