Մայքլ Ռ. Ջեքսոն «Զարմանալի հանգույց»

2021-05-02

Մայքլ Ռ. Ջեքսոն «Զարմանալի հանգույց»

 

Մայքլ Ռ. Ջեքսոնն առաջին սևամորթ գրողն է, որին Պուլիցերյան մրցանակի խորհուրդը պարգևատրել է մյուզիքլի համար («Զարմանալի հանգույցը»-ը տասներորդ մյուզիքլն է, որը շահում է այս մրցանակը): Այն նաև առաջին մյուզիքլն է, որն արժանացել է Պուլիցերյան մրցանակի՝ չցուցադրվելով Բրոդվեյի ոչ մի թատրոնում: Թեև ռեժիսորները ծրագրում էին այն բեմադրել, սակայն համաշխարհային պանդեմիայի պատճառով հետաձգվել է մինչև 2021 թ. ամառ:

Մայքլ Ռ. Ջեքսոնը ամերիկացի դրամատուրգ է, կոմպոզիտոր և երգերի տեքստի հեղինակ: Ծնվել է Միչիգան նահանգի Դետրոյթ քաղաքում: Նյու Յորքի Տիշ արվեստի դպրոցում ստացել է դրամատուրգի կրթություն, ինչպես նաև մագիստրոսի որակավորում՝ Երաժշտական-բեմական ստեղծագործությունների բաժնում:

2017 թ.-ին Ջեքսոնն արժանացել է Ջոնաթան Լարսոն հիմնադրամի դրամաշնորհին, իսկ 2017 թ.-ին եղել է Լինքոլն կենտրոնի նոր արվեստագետներ մրցանակաբաշխության 11 դափնեկիրներից մեկը:

2018 թ.-ին «Նյու Յորք Թայմզ»-ը Ջեքսոնին անվանել է «Մեր ժամանակների սևամորթ գրողներից»: 2019 թ.-ին դրամայի ասպարեզում նա արժանացել է Ուիթինգի մրցանակի և Հելեն Մերիլի անվան դրամատուրգիայի մրցանակի: Ջեքսոնը նաև Լամբդա գրական մրցանակի դափնեկիր է, ինչպես նաև Ֆրեդ Էբի մրցանակակիր` որպես երաժշտական​-բեմական արվեստի ոլորտում հաջողակ երգահան:

Նա գրել է գիրք, երաժշտություն և երգի խոսքեր՝ «Զարմանալի հանգույց» մյուզիքլի համար: Կոմպոզիտոր Ռեյչել Փիթերսի հետ գրել է գիրք և խոսքեր՝ «Միայն երեխաները» մյուզիքլի համար, ինչպես նաև կոմպոզիտոր և համահեղինակ Աննա Ջեքոբսի հետ 2007 թ.-ին գրել են «Ատամներ» սարսափ ֆիլմի ու երաժշտական մշակման սցենարները:

«Զարմանալի հանգույց» պիեսը ժամանակագրական տեսարաններով իրար հաջորդող ավանդական պատմություն չէ. այն պատկերում է մի կերպարի փորձությունները, որը ջանում է հաղթահարել իր ինքնաքայքայման հակումները: Կերպարը հենց ինքն է. «մի երիտասարդ սևամորթ համասեռամոլ տղամարդ, որը շրջում է Նյու Յորքում և փորձում իրական ժամանակում հասկանալ իր օտարացումը»,- այսպես է նկարագրում Ջեքսոնը:

«Զարմանալի հանգույցը», այսպիսով, ոգեշնչված է հենց գրողի կյանքից, բայց ինչպես ինքն է անվանում, ավելի շուտ «հուզական ինքնակենսագրություն» է, քան թե իրական: Կենտրոնում Աշեր անունով հերոսն է՝ մի խոշորամարմին, համասեռամոլ սևամորթ, որն աշխատում է որպես հսկիչ (անգլ. usher) «Լայոն Քինգ»-ում և պայքարում է մի խոշորամարմին, համասեռամոլ սևամորթի մասին մյուզիքլ ստեղծելու համար, որն էլ պայքարում է մյուզիքլ գրելու համար: 

Այս գլխապտույտ առաջացնող սցենարում ներկայացված է վեց խաղացող, որոնք պատկերում են Աշերի ներքին մտքերը, ինչպես նաև նրա կյանքի բոլոր կերպարները՝ ներառյալ ծնողները, որոնք նրան չեն հասկանում:

Այս գործն աչքի է ընկնում 18 մեղեդային երգերով, երգիծական դրվագներով, սրամտություններով, փոքրիկ ծաղրերգություններով, այլաբանական շերտերով և բազմիմաստ ակնարկներով:

 

© Նյութը պատրաստեց՝ Անի Գասպարյանը:

մեկնաբանություններ